viernes, 29 de febrero de 2008

Un regalu d'Italia

El CD tráxomelu Paco Álvarez a la vuelta d'un viaxe per Italia, y nada más recomendable pa combatir el tediu electoral d'estos tiempos de tribulación: Live In Punkow, una selección d'actuaciones en vivo de los CCCP/Fedeli Alla Linea, la banda punk más importante de la Italia de los 80. Nun cuento que-y prestara nada a la nena de Rajoy.
La de CCCP/Fedeli Alla Linea yera una propuesta d'agit-prop que, contra tolos pronósticos, tuvo hasta ésitu, lo qu'igual s'esplica pol humus ideolóxicu del que brotaron: la cultura popular de Reggio Emilia, bastión comunista na posguerra italiana y llugar d'orixe de los fundadores de la banda, Giovanni Lindo Ferretti y Massimo Zamboni. El so primer álbum, y el primeru tamién que d'ellos escuché, llevaba'l suxerente títulu de Affinità-divergenze fra il compagno Togliatti e noi. Del conseguimento della maggiore età. Políticamente incorrectos, tresmutáronse en CSI (Consorzio Suonatori Indipendenti) nos años 90, y depués Ferretti volvióse católicu y de dereches. Agora igual sí que ye la cuenta pa la nena de Rajoy.


miércoles, 27 de febrero de 2008

Perch'i' no spero di tornar giammai

Impotencia de traductor. Eses vegaes que’l testu ruempe contra la to intelixencia como una fola grandísima, enllena de fauna marina, de restos de barcos naufragaos y de significaos entrellizaos como guedeyes d’ocle. Quedo plasmáu énte’l valor de Jorge de Sena y T.S. Eliot y depués vuelvo y lleo otra vez el poema de Guido Cavalcanti col que s’atrevieron y constato, impotente, que yo nun soi quien. Asúmolu ensembre. Ye como querer traducir una cariátide.





Perch'i' no spero di tornar giammai, / ballatetta, in Toscana, / va' tu, leggera e piana, / dritte'a la donna mia, / che per sua cortesia / ti farà molto onore. / Tu porterai novelle di sospiri / piene di dogli' e di molta paura; / ma guarda che persona non ti miri / che sia nemica di gentil natura: / ché certo per la mia disaventura / tu saresti contesa, / tanto dal lei ripresa / che mi sarebbe angoscia; / dopo la morte, poscia, / pianto e novel dolore. / Tu senti, ballatetta, che la morte / mi stringe s', che vita m'abbandona; / e senti come 'l cor si sbatte forte / per quel che ciascun spirito ragiona. / Tanto è distrutta già la mia persona, / ch'i' non posso soffrire: / se tu mi vuoi servire, / mena l'anima teco / (molto di ciò ti preco) / quando uscirà del core. / Deh, ballatetta mia, a la tu' amistate / quest'anima che trema raccomando: / menala teco, nella sua pietate, / a quella bella donna a cu' ti mando. / Deh, ballatetta, dille sospirando, / quando le se' presente: / - Questa vostra servente/ vien per istar con voi, / partita da colui / che fu servo d'Amore - . / Tu, voce sbigottita e deboletta / ch'esci piangendo de lo cor dolente / coll'anima e con questa ballatetta / va' ragionando della strutta mente. / Voi troverete una donna piacente, / di s' dolce intelletto / che vi sarà diletto / starle davanti ognora. / Anim', e tu l'adora / sempre, nel su'valore.

lunes, 25 de febrero de 2008

Soncai System Live

Foto: Cortesía de Publicaciones Ámbitu.

Soncai System nel escenariu, per primer (y pel momentu única) vegada.
En Mieres, el pasáu xueves 21 de febreru. Fecha histórica.


sábado, 23 de febrero de 2008

Teoría del álbum

La idea podía paecer simple, frívola o pueril. Y de xuru que yera les tres coses. ¿Por qué, entós, llevala alantre? Seique pol mesmu enclín que nos fai metenos n’empreses más complexes, series y adultes: por pura diversión.
Escoyer un garrapiellu de discos que resumieren nun añu una vida entera de música. Y non sólo una vida: tantes vides como álbumes, una y bones partíemos de la convicción de qu’en caún d’esos trabayos atopábase un mundu distintu y propiu, l’anagrama d’una esistencia totalmente resuelta.
¿Por qué álbumes? ¿Por qué non, más bien, canciones? ¿Nun resume una canción, más incluso qu’un discu, lo que l’autor ambiciona de la vida? ¿Lo que-y pide al arte como vehículu de la so identidá?
La idea presuponía que non. Que les canciones son estaciones, pero los álbumes son el trayectu. Que les canciones son los fotogrames, pero los álbumes son la película ensembre.
Y ye una pena, porque hai canciones que broten en discos desprovistos d’otru interés qu’esa aisllada estación al aldu, igual qu’hai películes que contienen como únicu tesoru una imaxe irrepetible y non por eso nos sentimos obligaos a ver el filme enteru.
Igual que’l cine yera sonoru mesmo cuando yera mudu, el rock pidía pol álbum enantes mesmo de qu’esti fuera pensáu como vehículu pa esa forma de música. Les primeres canciones de Gene Vincent, d’Elvis Presley, de Little Richard: güei abúltennos aproximaciones, esperimentos, ensayos. Momentos calcificaos d’una dómina imperfecta.
D’eso se trata equí: escribir d’esos álbumes que podemos considerar parte de nueso, de la nuesa arquitectura interior, les trabes musicales del yo.
A razón d’un álbum diariu, y por tanto d’una vida y d’un mundu. A lo llargo d’un añu.
La vuelta al añu en 365 mundos.

viernes, 22 de febrero de 2008

In Taberna Quando Sumus

Cuando bebemos
somos un país de lleenda,
descubrimos aventures qu'otros ñeguen,
recordamos pallabres que yá nun s'escuchen
nin siquiera a los más vieyos del llugar,
decoramos los chigres con banderes
de tercios invencibles
y glayamos himnos devónicos
y rezamos a santos de papel y creemos en dioses d'otra xente.
Dizque somos más que nunca,
cuando bebemos
y lluchamos
n'otra galaxa con nomes de mentira.
Velequí los héroes, los imprescindibles,
los que defendieron Lancia y s'inmolaron con texu:
nellos creemos, confiamos, mentanto que bebemos.
Ye por ellos que somos inmortales,
infantiles,
cuando vocinglamos epopeyes
qu'aburren a los punkis
y adurmen a los vieyos
que pronuncien pallabres n'otra llingua
y arreñeguen de los nuevos salvapatries.

Xandru Fernández, Servidume, 2001