martes, 28 de abril de 2009

Enceso

Cuchillo Mundo ye una banda de Xixón formada por Álex Valero (batería), Román Pintado (baxu) y Fran Molinero (guitarra), con Misha Goldfarb a los teclaos. "Enceso" ye'l títulu d'esti tema, qu'inclúi un sample de Michael Foucault. Les semeyes son de Román Pintado.

domingo, 26 de abril de 2009

Vinculando

De vuelta de Madrid, mayaos pero contentos. Contábemos que diba ser perder el tiempu, que díbemos ser los más frikis de la pradera, que nun pagaba la pena. Y non. Volvemos con un bon garrapiellu de complicidaes, esperiencies compartíes, bon rollu. Vinculaos, ensin dulda.

jueves, 23 de abril de 2009

This Ain't No Picnic

Un pequeñu clásicu d'una banda grande: The Minutemen. A manera de carta d'axuste.

martes, 21 de abril de 2009

El novelista y el terror

El gran defectu de les noveles de Don DeLillo ye precisamente la prueba de la so maestría. Pal común de los llectores, les inquietúes de los sos personaxes son inintelixibles, igual que la mayoría de los sos diálogos, seique verosímiles nel ámbitu de la intelligentsia neoyorquina pero difíciles d’imaxinar en cualquier otru contextu. Y, nostante, esi pesu muertu nun fai naufragar la nave entera de la novela, como si les regles impuestes pol autor nos obligaren a aceptar, con elles, la petulancia de los sos caracteres.
Más que la elefantiásica Submundo, y muncho más que la forzada El hombre del salto, la novela que define la poética de DeLillo ye, pamidea, Mao II (xunto con esi tour de force tituláu White Noise o Ruido de fondo). De momentu, en tou casu, ye la que más rellectures soporta. La más cercana, en munchos aspectos.
En Mao II, la propia trama ye’l novelista, y sólo dende la óptica del novelista se nos vuelve verosímil la trama. Les meditaciones delilleanes sobre’l terror, la tecnoloxía, la lliteratura: sólo encaxen na novela en tanto qu’obsesiones d’un novelista que ye’l centru de la trama.
Con too y con eso, el gran aciertu de Mao II ye la figura de Bill Gray, l’escritor aislláu, misántropu, dipsómanu, displicente, incapaz d’enfrentase a la plausible esplotación de la so imaxe nel mercáu editorial. Sobrepuxando l’escesivu pesu d’una reflexón sobre la dialéctica ente la ocultación y el desvelamientu (reflexón que ye’l centru de la primer parte de la novela), la fuxida de Bill Gray, la so carrera al alcuentru de la muerte y les circunstancies en qu’esta se produz (exa de la segunda parte) conformen una trayectoria non por conocida menos seductora pa los que buscamos na novela una investigación de los claroscuros de la identidá. Remite, per otru llau, a un precedente venerable, el monumentu lliterariu col que toa gran novela dialoga queriéndolo o non: nesti casu, la trayectoria del Cónsul, el personax más grande de Malcolm Lowry, el gran títere dipsómanu, el gran negador y, tamién, el peor de los cautivos.
[PS: Hai unos años, punxi una cita d’esta novela p’abrir La banda sonora del paraísu. Paezme güei tan vixente como daquella. Póngola equí otra vegada.
Do you know why I believe in the novel? It's a democratic shout. Anybody can write a great novel, one great novel, almost any amateur off the street... Some nameless drudge, some desperado with barely a nurtured dream can sit down and find his voice and luck out and do it. Something so angelic it makes your jaw hang open. The spray of talent, the spray of ideas. One thing unlike another, one voice unlike the next.]

lunes, 20 de abril de 2009

En qué creo (JG Ballard)

Creo na amabilidá del bisturí, na xeometría ensin llímites de la pantalla de cine, nel universu ocultu dientro de los supermercaos, na soledá del sol, na llocuacidá de los planetes, na redundancia de nós mesmos, na inesistencia del universu y nel aburrimientu del átomu.
JG Ballard (1930-2009)

viernes, 17 de abril de 2009

35 razones

Y munches más, pero sobre too 35. Mañana. Pola decencia.

miércoles, 15 de abril de 2009

The Black Heart Procession: "2" (1999)

A finales del sieglu XX, el rock americanu vivió una vuelta a los raigaños que nun esperimentara dende la primer metá de los años setenta. Al llamáu “country alternativu” (Wilco, Lambchop, Cowboy Junkies) hai que-y sumar el trabayu d’un puñáu de bandes afincaes na frontera con México y que participaben (y participen) d’un ciertu aire de familia. Si bien la más popular (hasta ciertu puntu) ye Calexico, al mesmu ambiente de western mestizu pertenez The Black Heart Procession.
Nostante, tolo que ye solar en Calexico (o en Giant Sand) ye llunar en The Black Heart Procession. Acordies con unos postulaos estéticos non mui allonxaos de los de Brian Eno, sólo qu’armaos con una puesta n’escena de saloon cinematográficu, los temes que componen los tres primeros álbumes de The Black Heart Procession paecen sacaos de la banda sonora d’un western espectral. Particularmente’l segundu de los tres volúmenes apuerta a una belleza desoladora en temes como “The Waiter # 2”, “Blue Tears”, “When We Reach The Hill” o “The Waiter # 3”.

martes, 14 de abril de 2009

Porque sigue siendo'l rei

Y porque un día ye un día, y nun pue facer nada pa quitalu del calendariu.

domingo, 12 de abril de 2009

Sparklehorse: "Good Morning Spider" (1998)

En Good Morning Spider figura una d’eses rares canciones qu’enganchen a la primera y que se convierten, nel intre, en mantra guitarreru: “Happy Man”. Sólo hai un problema: la versión qu’apaez nesti álbum, “Chaos Of The Galaxy/Happy Man”, afuega’l cantar pente’l runfir d’una radio qu’intenta sintonizalu pero que sólo lo llogra en determinaos tramos. La estática meriéndase la metá de la canción. Y dicen les males llingües que’l propósitu de Sparklehorse (o de Mark Linkous, que vien a ser lo mesmo) yera precisamente’l d’evitar que “Happy Man” se convirtiera nun ésitu de les radiofórmules. Pasable esplicación. De nun ser porque’l propiu Linkous autorizó una versión más “llimpia” nel EP Distorted Ghost.
El presuntu sabotaxe de “Happy Man” obedez, pamidea, a una intención puramente estética, que rescampla nel álbum ensembre y en tola obra de Linkous, encuadrable na órbita lo-fi y emparentada cola de, por exemplu, Daniel Johnston, del que Linkous tien sío productor (de fechu, hai un tema de Johnston, “Hey, Joe”, nesti álbum). En más d’un corte pue sentise l’ecu incómodu de dalgún cacharru mal axustáu, el xirpíu d’una cinta enrollándose, l’espatuxar de canales saturaes onde los planos s’entemecen y truñen unos contra otros. Sparklehorse introduz na grabación esos otros elementos que (se supón) formen parte de la esperiencia auditiva, de la escucha como ambiente. Y ye’l casu que, seya’l que seya l’equipu reproductor, siempres va paecer que lo que tienes puesto ye un cacharru intratable, o a lo menos qu’hai daqué que se grabó con chismes de mui mala calidá.
D’haber llucha de clases nel planu acústicu, esta diba ser la so forma d’espresión: l’ecualizador dexa de ser una ferramienta pa llimpiar el soníu y conviértese nun arma pa emporcalu. La mano maestra de Linkous como compositor (compositor convaleciente, una y bones compunxo parte del material de Good Morning Spider nuna habitación del hospital St. Mary de Londres) encárgase de tolo demás: temes como “Pig”, “Painbirds”, “Sick Of Goodbyes” o “Sunshine” (con Vic Chesnutt d’artista invitáu) son delles de les impresionantes pieces d’un discu qu’hai que sentir pa creer.

viernes, 10 de abril de 2009

Sparrow Falls

Por suxerencia de dellos amigos, y pa pasar estes feches tan poco navegables, un cachu d'un memorable conciertu de Woven Hand que, en ciertu sentíu, tuvo muncho de viacrucis. En Paredes de Coura, allá per agostu de 2005. El tema, "Sparrow Falls", pertenez al álbum Consider The Birds (2004).

miércoles, 8 de abril de 2009

2+2=5

-¿Cuántos dedos hay aquí, Winston?
-Cuatro.
-¿Y si el Partido dice que no son cuatro sino cinco? Entonces, ¿cuántos hay?
-Cuatro.
[George Orwell, 1984.]

lunes, 6 de abril de 2009

Cuenta atrás

Bueno. Dellos llectores d'esti blog yá lo saben, pero ye'l momentu de compartilo con toos. Hai yá tiempu abondo que Silvia y yo entamemos los trámites p'adoptar un nenu o una nena n'Etiopía. Tiempu más qu'abondo: demasiao. Trámites que s'espurríen pa un llau y pa otru como venes de chicle. Sabemos de sobra qué significa'l verbu aprovecer.
Depués de dar más vueltes que K. delantre'l castiellu, la última etapa abrióse por fin. Güei citáronnos pal "taller" previu a la "preasignación" (el vocabulariu del universu adoptante merez un diccionariu pa él solu): el 24 d'abril, en Madrid. Pa en delantre, ye d'esperar que los plazos seyan razonables.
Taba prometío: un cantar de Pearl Jam por cada bona noticia.
Tamos de folixa.

sábado, 4 de abril de 2009

Ser humanu

Skanda ye'l buque insignia del folk-rock n'Asturies. Y estos son los sos poderes.

viernes, 3 de abril de 2009

Una recomendación

Nel myspace de Losone van xubiendo, pasu ente pasu, temes nuevos. L'últimu, de seis intensos minutos, acabante cuasimente de grabar. Depués que nun se diga que nun avisé.