Sparklehorse: "Good Morning Spider" (1998)

En Good Morning Spider figura una d’eses rares canciones qu’enganchen a la primera y que se convierten, nel intre, en mantra guitarreru: “Happy Man”. Sólo hai un problema: la versión qu’apaez nesti álbum, “Chaos Of The Galaxy/Happy Man”, afuega’l cantar pente’l runfir d’una radio qu’intenta sintonizalu pero que sólo lo llogra en determinaos tramos. La estática meriéndase la metá de la canción. Y dicen les males llingües que’l propósitu de Sparklehorse (o de Mark Linkous, que vien a ser lo mesmo) yera precisamente’l d’evitar que “Happy Man” se convirtiera nun ésitu de les radiofórmules. Pasable esplicación. De nun ser porque’l propiu Linkous autorizó una versión más “llimpia” nel EP Distorted Ghost.
El presuntu sabotaxe de “Happy Man” obedez, pamidea, a una intención puramente estética, que rescampla nel álbum ensembre y en tola obra de Linkous, encuadrable na órbita lo-fi y emparentada cola de, por exemplu, Daniel Johnston, del que Linkous tien sío productor (de fechu, hai un tema de Johnston, “Hey, Joe”, nesti álbum). En más d’un corte pue sentise l’ecu incómodu de dalgún cacharru mal axustáu, el xirpíu d’una cinta enrollándose, l’espatuxar de canales saturaes onde los planos s’entemecen y truñen unos contra otros. Sparklehorse introduz na grabación esos otros elementos que (se supón) formen parte de la esperiencia auditiva, de la escucha como ambiente. Y ye’l casu que, seya’l que seya l’equipu reproductor, siempres va paecer que lo que tienes puesto ye un cacharru intratable, o a lo menos qu’hai daqué que se grabó con chismes de mui mala calidá.
D’haber llucha de clases nel planu acústicu, esta diba ser la so forma d’espresión: l’ecualizador dexa de ser una ferramienta pa llimpiar el soníu y conviértese nun arma pa emporcalu. La mano maestra de Linkous como compositor (compositor convaleciente, una y bones compunxo parte del material de Good Morning Spider nuna habitación del hospital St. Mary de Londres) encárgase de tolo demás: temes como “Pig”, “Painbirds”, “Sick Of Goodbyes” o “Sunshine” (con Vic Chesnutt d’artista invitáu) son delles de les impresionantes pieces d’un discu qu’hai que sentir pa creer.