jueves, 26 de mayo de 2011

¿Y los acampaos? ¿Qué opinen d'esto?

Al final va resultar que'l 15-M tien la culpa de too. A lo primero, enantes de les elecciones del domingu, yera la derecha la qu'esprecetaba contra los acampaos, acusándolos de tar al serviciu de Rubalcaba pa propiciar un vuelcu electoral hacia la izquierda. Xente fino d'oyíu, estos d'Intereconomía. Agora ye una parte de la izquierda la que responsabiliza a los “indignaos” del xostrazu del PSOE, como si'l PSOE necesitara ayuda pa espetásela como se la espetó. Los amantes de l'aritmética electoral busquen la proyección del 15-M nos resultaos del domingu y nun la ven per nengún llau, o nun la ven n'Izquierda Xunida, que ye onde esperaben que tuviera. Delles facciones del espectru izquierdista intuyen la mano negra de la CIA y d'Enrique Dans asomando pela tramoya. Y como les elecciones yá pasaron, y hai matu que revolver con esto de les reacciones a la derrota y al triunfu y los pautos de gobiernu y la música en Pravia, los medios más “sensibles” empiecen a aborrecer el siguimientu d'una revuelta que nun ven traducida en votos nin en cargues policiales.
Ye lo que tien l'afición al teatru clásicu: too tien que tener plantegamientu (15-M), ñudu (20-M) y desenllaz (22-M), a ser posible en dos hores y con cares conocíes ente los actores. Pero en vista de que Willy Toledo da pa lo que da y yá nun queda un solu iconu de la izquierda mundial disponible pa bodes, bautizos y comuniones, al respetable públicu ta dándo-y la impresión de qu'aquello del anonimatu y de lo cívico diba en serio y cada vez son menos los qu'aplauden la función.
Nesto, hai que dicilo, el movimientu 15-M foi honestu: nun pidió'l votu pa naide, declaróse absolutamente al marxe de los partíos, anunció que les movilizaciones nun teníen como horizonte les elecciones del domingu, y avisó de qu'esto diba en serio y pa llargo. Esto último tovía nun podemos verificalo, pero tolo demás sí.
En cualquier casu, el 15-M ye un acontecimientu (cuasi en sentíu heideggerianu) y un fenómenu políticu y sociolóxicu que d'una manera o d'otra ta influyendo y va influir na política española. Como mínimo, representa'l bautismu políticu d'una xeneración, y a naide debiera estraña-y qu'ente los más mozos de los acampaos heba propuestes pueriles, inmadures o utópiques: ¿foi diferente otres veces? ¿O ye que los que salimos de la infancia cuando'l Cojo Manteca andábemos toos colos Grundrisse embaxo'l brazu? Nun ye esi'l recuerdu que yo tengo.

4 comentarios:

miguel allende dijo...

Hai delles coses que me llamaron l´atención dende´l principiu, Xandru. El casu ye que nun fue nin una persona nin dos les que fixeron preguntes como ¿quién ye esa xente? (dramatis personae???), ¿quién ta detrás? (l´apuntador???) o ¿por qué agora? (tempo de l´acción???). Creo que preguntes d´un sieglu que morrió, que nun somos a responder con pallabres del XXI. Yo lo que vi cuando m´acerqué fue una especie de performance (d´eses que salen sin querer): delantre un cartel d´esos que ponen “Nun hai pan pa...” taba un paisanu de la cuenca (quiciás fuere Godot) de unos setenta diciendo qu´él venía a trae-yos unes vueltes de chorizu.
Yo lo que sentí y siento toos estos díes ye un aliviu mui grande.

Moisés. dijo...

El problema que tien un movimientu tan sumamente ampliu y anónimu ye que nunca se sabe si va materializase realmente en daqué. A veces la rocea que los "indignaos" tienen contra les instituciones-yos impiden ver que, o bien facemos una revolución y les valtamos (y eso nun va pasar) o bien tenemos que deprender a contar con ellos. Nesti sen, propuestes como recoyer firmes pa obligar a los parlamentarios al cambiu de la llei electoral o a que los políticos imputaos nun puean ostentar cargos atópense col argumentu contrariu de "nun queremos nada col Parlamentu".

Con too, creo que precisamente si'l movimientu 15M ta teniendo tantes crítiques dende la esquierda ye porque nun hai una cara que pone-y detrás, tamos demasiao avezaos a poner cares (y en función de qué cares hai detrás de la pancarta, ponémonos o non). Aparte de que, sinceramente, la mayor parte de la esquierda sintióse decepcionada de nun tener réditu políticu d'esti movimientu.

Xandru Fernández dijo...

Ye p'analizar la poca relevancia que tienen los plantegamientos revolucionarios na izquierda de primeros d'esti sieglu. Creo qu'en parte ye por culpa del fetichismu llingüísticu y en parte por un enguedeyu semióticu: "revolución", en cualquier casu, ye un términu gastáu poles sos connotaciones pero que, paradóxicamente, ta alquiriendo una presencia mediática que cuantayá que nun tenía. Cuando surden movimientos como esti ye cuando se ve a les clares cómo la izquierda dexó pa prau la teoría revolucionaria.

miguel allende dijo...

Hai que dir delles veces a prensa estranxero, porque aquí non siempre se fala claro. Los votos blancos y nulos llegaron a cotes históriques que supón el 4,2 por cientu del electoráu, esto ye, la cuarta fuerza.
" D'un côté, les votes blancs et nuls ont augmenté, touchant des sommets jusqu'ici jamais atteints dans la démocratie espagnole. Le vote blanc a représenté 2,45 % des voix exprimées (+ 0,62 % par rapport au dernier scrutin municipal) et le vote nul est passé de 1,17 % à 1,69 %. En additionnant le vote nul et le vote blanc, on arrive à près de 4,2 %, ce qui en fait potentiellement la quatrième force politique au niveau national." Le Monde.(Artículu completu de ¿CUAL FUE L´IMPACTU DEL MOVIMIENTU 15-M NES ELECCIONES ESPAÑOLES?)

http://bigbrowser.blog.lemonde.fr/2011/05/23/vote-blanc-quel-a-ete-limpact-du-mouvement-du-15-mai-sur-les-elections-espagnoles/

Ye una opinión más, pero visto dende fuera.