"Que tiene por trono la cuna de España"

En dalgún sitiu tengo escrito que'l branu ye la estación más afayadiza p'asoleyar los verdaderos deseos de caún: xeneralmente, lo qu'ún fai en vacaciones tien más que ver colo qu'ún quixera ser que colo que realmente ye a lo llargo del añu. Tamién-yos pasa a los gobernantes: de mano, pol fechu fundamental de qu'en vacaciones nun suelen facer más nada que folgar y conceder entrevistes, pero tamién porque, cuando fain otra cosa (cuando trabayen porque nun-yos queda otra), aprovechen que la oposición y los ciudadanos tán de vacaciones, y que los medios de comunicación furrulen a mediu gas, y asina saquen a la lluz tolos sos petites, hasta los más secretos.
Los nuevos gobernantes d'Asturies, y ente ellos los del Conceyu de Xixón, seguro que quixeren tamién andar de folixa, pero, como prometieron trabayar a tres turnos y amás tardaron tanto en vistir al muñecu, agora resulta que tienen que facer hores extra. Empezar a gobernar en branu, la verdá, tien que ser un poco aforfugante, pero conozse que se pasa l'aforfugu esteriorizando los mieos y les ambiciones qu'igual en cualquier otra estación del añu permanecíen más na solombra. En Xixón, amás, el branu ye propensu al discutiniu ideolóxicu, dizque pola Semana Negra y pola Feria de Begoña. Anque tamién ye verdá que pal que quier notoriedá cualquier mes-y acomoda.
Hai unos meses, púnxi-y la etiqueta de “asturcasquismu” a cierta tendencia política marxinal que, dende l'independentismu en munchos casos, y dende la defensa del patrimoniu llingüísticu asturianu en cuasi toos, cree sinceramente que la nueva singladura política de Francisco Álvarez Cascos va conducir a la oficialidá de la llingua asturiana y seique tamién a un reforzamientu del sentimientu nacional asturianu frente al nacionalismu español. Tamién califiqué al asturcasquismu de “pulsión suicida”. En viendo l'eslogan de precampaña del FAC, “Más Asturias, mejor España”, nun puedo facer otro que repetir lo que yá dixi. Pero, a la vista de la espontaneidá braniega de los casquistes xixoneses, toi por sorrayar lo de suicida y ponelo en mayúscules.
Non sólo los asturcasquistes tán encantaos colo muncho que'l FAC sopelexa la bandera d'Asturies. Tamién un sector de la izquierda sedicente (del PSOE, pa entendenos) asiste con muncha seriedá a la representación y saca conclusiones. Vivimos momentos tan históricos qu'esta ye de les poques veces que'l PSOE ta d'alcuerdu en dalgo con dalgún nacionalista asturianu: en qu'equí les elecciones ganóles una versión autóctona de Bildu. Nun vamos facenos los sorprendíos: tamién ye verdá que, a la d'analizar la realidá social asturiana, nin el PSOE nin les versiones más populares del asturianismu políticu tienen acertao muncho hasta agora.
Lo que ganó equí, col FAC, nun foi otro que'l cuadonguismu. “Más Asturias, mejor España” ye la versión tweet del conocíu “Asturias es España y lo demás tierra conquistada”. Esi discursu asturianista ye'l que viende. Vendió siempre. Al PSOE dio-y dividendos n'otra época, y si agora prefier distanciase d'él ye por pura táctica. Hasta onde yo sé, el cuadonguismu nunca foi otro que l'encontu simbólicu autóctonu del nacionalismu español más racista y escluyente, partiendo de la esaltación de la victoria contra l'Islam y de la ficción histórica d'una conciencia nacional española anterior al propiu conceptu de nación. Conxugar eso cola pluralidá llingüística, poder podráse, pero ta por ver cómo.
Hasta ehí (esta ye la mio hipótesis) va llegar el presuntu asturianismu d'Álvarez Cascos. Lo que significa, tamién, qu'en cuenta de más Asturies vamos tener más España, eso si nun llegamos por fin a la identificación total ente dambes les dos realidaes. Con otra consecuencia de non menor interés y, pa min, muncho más preocupante: la paralización del procesu normalizador de la llingua asturiana. Por dos razones: una, porque'l cuadonguismu pue sobrevivir perfectamente ensin llingua asturiana (ye más, pue sobrevivir meyor ensin ella: el cuadonguismu nunca supo esactamente qué facer col idioma), y dos, porque la usurpación de l'asturianía por parte del FAC va xenerar (si nun ta xenerando yá) reacciones d'oposición a la normalización llingüística (reacciones que, de dase, nun van tener nel FAC nin l'únicu nin el principal responsable: caveat emptor).
Quixera enquivocame en too ello. Intento pensar en tola xente sensato con responsabilidaes polítiques a un llau y a otru d'esta llinia Maginot que va poco a poco dibuxándose, y caltengo cierta confianza en qu'esto s'enverede. Yá veremos.