Tovía l’otru día falábemos de El guardián entre el centeno, una de les noveles más asombroses que conozo y, nostante, según dixi entós y repito, el peor llibru de J.D. Salinger. De los cuatro que tien: un póker d’ases del que ye difícil escoyer el palu ganador porque, como tol mundu sabe, lo qu’importa ye la mano.
Namoréme, como munchos, de El guardián entre el centeno a la primer llectura, y qué sé yo lo que daba por acercame siquiera a concebir una sola páxina que nun paeciera un cagayón al llau d’esa novela. Crecí como llector de Salinger al asomame a los Nueve cuentos, y mentiría si dixera que la primer impresión que saqué de “Un día perfecto para el pez plátano” tuvo dalgo que ver cola lliteratura: foi un trallazu de mui otru signu. Adoré a Seymour Glass. Llorélu. Adoptélu d’hermanu, como si tuviera pocos (quiero dicir Seymour), y entendí la mio vida, o bona parte d’ella, gracies a les páxines onde Salinger-y dio vida y-y dio muerte.
Pa munchos, J.D. Salinger yera un escritor d’otra época, un muertu en vida cuasimente, una y bones llevaba décades ensin dar a lluz un textu nuevu. Pero sólo agora ingresa nel llau d’allá, onde ún ye indiferente a los bilordios y a los homenaxes. Pa munchos, ente los que me cuento, J.D. Salinger yera lo más paecío a un dios viviente: un creador retiráu, observador implacable de les sos creatures, espectador de l’adoración qu’estes espertaben y de la vesania que, contra él, dende él, alimentaba la so figura llonxana. A partir d’agora, definitivamente, nun creo en dioses.
8 comentarios:
Salinger, el mitu, homenaxáu ya estrapayáu nel "Mao II" de Don DeLillo: el Gran Escritor Americanu, dizque retiráu, dizque nel so llaberintu demiúrxicu, nel centru d'un mundu que nun ye el Mundu, sinón el centru la paradoxa... Escapando la Lliteratura, clásicu vivu; escapando los Media, gurú ausente ya na perpetua ubicuidá (comu'l Gran Hermanu); escapando'l mitu pontifical del escritor, Nueu Mitu Pontifical del Escritor; escarbando nel costumismu USA, universal; narrador na ortodoxa, santu patrón de los heterodoxos...
Nun tien un res que ver con Salinger, esi mitu qu'incarnara, pero a DeLillo parecía-y que, nuna realidá complexa que nun podía ser yá la suya, esi escritor diba morrer comu la estrella de mar nel sable: fraxilísimu, inútil, nes manes de poderes superiores ya víctima d'un redol axenu y hostil.
Ya, con too, Salinger tampoco nun ye esi escritor...
El centru d'un gran Fueyu Negru tien que ser un gran vacíu; el centru desi gran vacíu, concentración escomanada d'enerxía, como mínimu. D.E.P.
Un día perfecto para el pez plátano ye una maravilla Xandru. Con muy poca extensión en páginas cuenta muches coses.
Comparto dafechu'l to comentariu. A min "El guardian entre el centeno" dexome friu. Lleílu de posadolescente y nun enllenó les mios espectatives, supongo que d'atopar unes lletres que m'allumaren (tontu que ye ún de mozu). Depués, lleí daqué más del autor y tamién flipé cola hestoria de los pexes pládanu.
Voi facete una recomendación musical, sinon conoces el grupo, o entrúgote pola t'opinión sobre esti discu (tien de prestate si gústate l'emo): "Addiction of Duplicates" d' A Room With a View
A mi tamién m'encató "El Guardián", pero quiciás nun tuvi esi puntu de revelación, seguramente porque lleílu un pocoñín tarde (más cerca de los venti que de los quince), pero'l que sí me paez que lleí nel so momentu xustu (pola temática y ambiente del cuentu y los sos personaxes) foi "Levantad, carpinteros, la viga del tejado", que sí tuvo pa mi esi toque d'epifanía, y por eso téngo-y un poco más de ciñu a esta pequeña xoya.
Un abrazu.
Héctor Pérez Iglesias
Yo El Guardián lleílu con quince, la edá perfecta, alcuérdome que racionaba les páxines pa que me durare más díes; y a la segunda llectura con 22 años paecíame que yera otru llibru completamente distintu y Holden Caulfield un guah.e rompegüevos de coyones. Será que me volví una rancia.
Yo sí lleí "The Catcher in the Rye" a los quince o deciséis años. Nin cubrió les mios espectatives daquella nin les recupera agora: nun sé qué ven, qué veis, nesa novelina. A mi dexóme fríu, o pior, dexóme cola sensación de perder el tiempu. Será cosa de gustos. La famosa "obra maestra" de Salinger nun me diz nada de nada, qué-y voi facer...
Y pa los qu'escriben los comentarios nesta llingua, una mínima reflesión llingüística: "El guardián entre el centeno" nun ye'l nome orixinal de la novela nin el so nome asturianu.
Besos y abrazos.
Lo meyor que nos pue pasar ye que nun nos pongamos d'alcuerdu. Eso evítanos santificar les fiestes y les personalidaes. Namás quería añedir un par d'observaciones. Llibros como "El guardián entre el centeno" van precedíos pola so fama, y eso nun favorez l'alcuentru cola obra, anque sí favorez, y muncho, que la obra "s'alcuentre" (en llibreríes y biblioteques). Qu'hai llibros que nos gusten más nuna época que n'otra, que nos dicen más o menos, que conecten más o menos coles nuestres espectatives nesi momentu: tamién. Que "Levantad, carpinteros, la viga maestra" ye, pal mio gustu, la gran obra de Salinger xunto con cuentos como "Un día perfecto para el pez plátano" o "El hombre que ríe" (y esa obrina maestra que ye "Seymour. Una introducción"). Por último, aclaro que nesti blog suelo citar los títulos de los llibros na versión que yo lleí, y "El guardián entre el centeno" lleílu en castellán. Toi d'alcuerdu col últimu comentariu en que, si se traduz al asturianu, diba tar bien busca-y un títulu más axustáu al orixinal ("catcher", como toos sabemos, nun ye "guardián").
Besos a toos y a toes.
Pues yo casique nun lleí a Salinger. Nun m'alcuerdu si lu lleí, anque m'alcuerdo de delles pallabres que añudaben frases que facíen mui grandes les llendes d'una vida vivida nun sitiu pequenu. Casique nun llei a Salinger y asina y too alcuérdome de la vida que mos dio na hora d'una muerte muerta va cuantayá.
Publicar un comentario