Antisistema

La victoria n’Asturies del FAC (o de Cascos, que vien a ser lo mesmo) tiennos a munchos col ánimu encoyíu y ensuchu. ¿Por? ¿Nun naguábemos, esos mesmos munchos, por una bona cuelma pal PSOE depués d’estos doce años? ¿Qué esperábemos que viniera a sustituilu? ¿Bloque por Asturies-UNA? ¿Izquierda Xunida? ¿Pocoyó? Yera evidente’l color ideolóxicu que diba vistir esti país depués de la derrota del PSOE, y la única sorpresa pue ser que, envede’l PP (lo esperable, pola deriva electoral española), seya Cascos el que garre’l virreinatu. Esi ye’l nuesu fechu diferencial, y nun hai que lu inorar allegremente.
Cascos, como iconu, ye un personax clásicu y reconocible. Nacíu en Madrid de familia asturiana, factótum de la nueva derecha española, ex diputáu y ex ministru, relativamente inclináu a esibir la so condición d’asturianu como si se tratara d’un títulu nobiliariu: con eses credenciales, la figura que más se-y paez de tola nuesa historia política ye Alejandro Pidal y Mon, ministru de fomentu de cuando la Restauración (la primera). Pero la so proyección mediática entemez elementos que proceden de Pelayu, Xovellanos y Vázquez de Mella (como tamién d'otros non asturianos, lléase Manuel Fraga), colo que ye fácil que caún tienda a ver na so imaxe una sola faceta, más o menos resultona o apavoriante, en llugar del conxuntu.
¿Cuál de los munchos Cascos ye’l real? Siguiendo’l motto aristotélicu, el carácter resuélvese nes acciones, y a les acciones pasaes hai que se remitir (y hai pa tirar d'hemeroteca hasta perder el sentíu), pero tamién, y sobre too, a les futures, una y bones nunca nun lu vimos representar el papel de presidente. Entrín que lu representa y que non, va haber que reparar na so condición de recipiente. De recipiente de votos y aspiraciones, ello ye: Cascos como emblema d’un colectivu.
¿Quién ye’l votante del FAC? ¿Podemos presuponer que tamos énte un electoráu de clase, o trátase d’un votu interclasista? ¿Rural o urbanu? ¿Masculín o femenín? ¿Qué pesu tien, nesi electoráu, el sector asturianista? ¿Y el sector españolista? ¿Cuántos de los sos votantes son ex votantes del PSOE? La dificultá de resolver toes estes cuestiones beneficia a la figura de Cascos como iconu del común. Pero, como lo que ye del común nun ye de nengún, cuesta facese una idea d’en qué fase nos atopamos y de qué tipu de xestión de la cosa pública vamos tener pa los próximos cuatro años.
¿Va haber pautu a la navarra, FAC-PP? ¿O a la cántabra, FAC-PSOE? ¿O a la vasca, PSOE-PP? El pautu, seya'l que seya, ¿va ser un pautu de gobiernu, o un pautu de non agresión que dexe a Cascos (o al que seya) desenvolvese en minoría? La solución va conocese en nun tardando. Mentanto, pue aventurase que la decisión va responder non sólo a los intereses materiales de los implicaos (que son munchos, tanto los implicaos como los intereses) sinón tamién a la llectura que dende'l FAC se faiga del resultáu electoral.
Dos llectures posibles: o'l FAC entiende que los resultaos n'Asturies son una forma peculiar pero non diferencial de lo qu'ocurrió'l 22-M en toa España, o entiende que lo d'equí ye otra cosa y qu'alredor de Cascos movilizóse una bona cantidá de votu antisistema.
Lo d'antisistema va en serio. El sistema de repartu del poder n'Asturies, desque s'abrieron los cielos y llovió transición, da pie a pensar qu'equí hai un consensu ocultu o tácitu ente los dos grandes partíos, que'l PP nun gana porque nun quier gobernar, o que (soi más partidariu d'esta última manera d'espresalo) los grupos de presión más proclives a apoyar a la derecha tán más que cómodos con un gobiernu del PSOE. L'esperimentu de 1995-1999 (gobiernu de Sergio Marqués, propiciáu pola crisis interna de la FSA tres de la dimisión de Rodríguez Vigil) punxo de manifiestu que n'Asturies nun hai un proyectu a la derecha del PSOE que permita sumar voluntaes ensin fricción colos intereses de los grandes grupos de presión. Nun toi en condiciones d'afirmar qu'esi panorama tenga cambiao estos últimos años, pero'l regresu de Cascos da pie a pensar que sí. En cualquier casu, tanto si esi regresu supón la consumación d'un procesu d'alternancia real, como si se trata d'una aventura solitaria, les fuerces que se movilicen alredor de Cascos tienen vida propia. Esto nun ye más qu'una impresión mía, pero dame que'l FAC collechó un importante respaldu de votantes tradicionalmente socialistes, especialmente en Xixón (nes demás ciudaes nútrese aritméticamente de lo que pierde'l PP, mientres qu'Izquierda Xunida gana lo que pierde'l PSOE). Nun ye inesplicable, pero ye traumático, y tien muncho de broma pesada. Paez que se mezcló la política cola diurética, pero nun debiera cayenos embaxo que los más ablayaos por esti votu antisistema somos precisamente los que menos-y debemos al sistema.