jueves, 19 de mayo de 2011

De bongos y gafapastas

Esti día, falando de les acciones del movimientu 15-M, un amigu míu (una de les poques persones que conozo capaces de pronunciar “tetrástrofo monorrimo” ensin trabucase) fixo’l siguiente comentariu: “Vilo en televisión. Había munchos bongos. Nun acabo d’entender la relación ente manifestaciones y percusión”. El xuiciu estéticu anticipa’l discurrir políticu sobre esta spanish revolution que, ente otres consecuencies inmediates, arreya la de sublimar los acentos identitarios ensin necesidá de qu’intervenga’l fiscal del Estáu. La proliferación de perendengues, bongos, rastas y tol restu de la impedimenta perroflautil ente los acampaos nes places españoles, ye fácil que nos mueva a interpretaciones precipitaes (aclaro que nun ye’l casu del mio amigu, que sólo comparez equí en calidá de recursu retóricu). Ente elles, interpretaciones como les que gasten Esperanza Aguirre y el TDT Party, emperraos en convertir el movimientu ciudadanu nuna comedia titulada ¿Ónde ta Willy (Toledo)?, a ver si asina, a fuerza de frivolizar, los ánimos apanden y los perroflautistes vuelven pa casa, o pal metro (si lu hubiere). El panorama, nostante, nun ye tan uniforme, y ye por ello que les posiciones énte lo que tal paez una revuelta en toa regla van variando conforme pasen les hores. La impugnación del bipartidismu fai difícil que tanto’l PP como’l PSOE (como CiU en Catalunya) puedan sacar tayada d’estes acciones. Les reacciones de los sos dirixentes, en cuenta de mancar, contribúin a fortalecer les protestes, y si a ello-y sumamos l’aportación necesariamente imbécil de les xuntes electorales prohibiendo les concentraciones ciudadanes, el feliz resultáu ye que’l movimientu 15-M viense arriba.
Efectivamente, un acontecimientu social como esti mueve, de mano, a la confusión y a la perplexidá de parte de la sociedá civil, que, o bien se dexar conducir de la mano de los media, o bien echa mano de terminoloxía vieyo pa categorizar un fenómenu relativamente nuevu. Hai postures ecuánimes y análisis axeitaos que merez la pena conocer, y en tou casu les protestes continúen y, con elles, los debates. Les coses nun tán tan quietes como pa que podamos retratales perfectamente enfocaes, anque tampoco se mueven a tanta velocidá como pa declaranos incapaces de reconocer tendencies, afinidaes, causes, motivos y posibilidaes. La multitú como espaciu de lo posible tien una dimensión temporal que se resiste a les taxonomíes.
Otra manera, nin se nos escapa la inestabilidá de les protestes nin podemos deducir d’esa inestabilidá una refutación en bloque. Ye verdá: ciertu elitismu intelectual, mui común ente dellos sectores de la izquierda, ponse blancu al descubrir ente los manifestantes (o ente los sos avatares nes redes sociales) a bona parte de la cla gafapastil que na vida s’interesó pola política pero que ve mui guai twittear dende’l focu de la noticia y participar d’un momentu históricu. Y tamién ye verdá que pa la izquierda real (minoritaria, pero real), amás d’inxusto, resulta un poco aforfugante comprobar cómo bona parte de los manifestantes, tanto del sector gafapasta como del sector bongos, nun tien la menor idea de lo que se cuez nel espectru políticu al marxe del bipartidismu xustamente impugnáu. Pero incluso esi diletantismu ye prometedor y, en cualquier casu, el pedigrí siempres será contrarrevolucionariu.

5 comentarios:

Unu dijo...

Matrioshka. Tu tamién tas faciendo dalgo de gafapastismu click-activista equí. Meyor pases mañana per una de les acampaes y falamos: conociéndote, lo que vas ver y sentir ellí va prestate. Ta mui lloñe del "postureo" o la indefinición política. Esta tarde en Xixón foi una folixa del pensamientu críticu y dixéronse coses perguapes: dende la crítica altermundista al modelu de producción, a les nueves estratexes non-armaes pa la revolución popular del sieglu XXI pasando pol movimientu vecinal rural y l'asamblearismu universitariu. Tábemos los de siempre, pero tamién xente que nunca tuvo. Viendo como se fai un Conceyu Abiertu. A mediu camín énte l'adolescencia y el realismu.

Qué guapos estos díes de primavera nestes ciudades grises de mierda, Xandru.

Xandru Fernández dijo...

Unu: Apetezme muncho respondete y facelo con tiempu, ciñu y retranca (les tres coses). Pero tengo decidío (anque bien ye verdá que nun lo dixi equí) que pa en delantre nun voi responder a comentarios que nun vengan firmaos. Una pena.

Moisés. dijo...

Yo tuve ayeri na Escandalera, y claro que siempre hai dalgún gafapasta o dalgún colos bongos, que polo demás, ye un rollu qu'a mi nun me mola, pero son vecinos (prefiero más vecinos que ciudadanos) como tu y como yo, poro, hai que tenelos en cuenta como a tol mundu. Con too, la mayoría de la xente qu'había ellí yera xente "normal" (nel sen más estrictu y a la vez más ampliu de la palabra). Yo tuve un bon ratu falando con un médicu retiráu, la so preocupación yera (como la de cualesquier vecín) que los sos nietos nun tuvieren una vida peor que la suya. Estudiantes, trabayadores... Los coches que pasaben pitaben en señal d'apoyu, de la que diba pa La Escandalera metime por una cai que nun yera y entruguéi a un paisanu (al primeru que vi) cómo llegar, sólo-y faltó dame un abrazu...

Nun me paez del too xusto pensar qu'esto ye cosa de gafapastes y de guah.inos refalfiaos col iphone na mano (nun pongo esto na to boca, eh, pero ye lo qu'oigo a la xente que ta en contra d'esti movimientu).

A la esquierda real paez-y inxustu que la xente pase d'ellos y agora respalde esto, pero ye que la esquierda real tien que plantegase si la xente-y debe fidelidá a la esquierda real o ye la esquierda real la que-y debe fidelidá a la xente. Nesi sen, una razón pola que la xente apoya esto y non a la esquierda real ye porque nesto ve (con más o menos razón, que podríemos discutilo) a "xente normal", como cualquier fíu de vecín, mientres que na esquierda real ve a teóricos que divaguen pero que son, nel fondu, "políticos" (cuidáu, que nun digo qu'esta seya la mio visión, anque en parte yelo, sinón lo que creo que piensa la mayor parte de la xente), al final la xente te diz "si gobernase el to partíu (llámalo IU, PCPE, BA-UNA, CUPX...) fairíen lo mesmu que'l PSOE", esto dixéronmelo a mi cuarentamil veces tanto cuando milité n'IAS como cuando milité n'IA. Pero la esquierda real nun ye consciente de que despierten esa opinión na xente (merecida o inmerecidamente, eso ye otru tema).

Xandru Fernández dijo...

Totalmente d'alcuerdu contigo, Moiso. El que tovía quiera andar esibiendo credenciales o pedigrí d'izquierdista históricu, ye que nun s'enteró de lo que significa ser d'izquierda.

Víctor dijo...

Lo primero que estáis muy acertados cuando habláis de lo de la pureza de sangre y lo de andar repartiendo carnets.

Lo segundo que yo seguí el movimiento (sin acudir a ninguno de los actos convocados, no me voy a subir al carro tampoco) a partir de nolesvotes -tengo colegas por ahí- y que sin estar de acuerdo con todo lo que dicen ni mucho menos -me asusta el tema de las nacionalizaciones- hay cosas de las que piden que son fundamentales.

Hay que dejar de celebrar los años que cumple la constitución y sentarse a reformarla. Hay que intentar romper la brecha generacional entre los que en el fondo -hablo por mi- somos unos privilegiados y las nuevas generaciones -no nos olvidemos que algún día estarán ahí nuestros hijos- que tienen muy complicado el acceso a unos estándares de vida similares a los nuestros.

Me parece de vergüenza la postura de Pedro J -pudo ser el mejor periodista de España pero al final el tiempo lo está poniendo en su sitio- y satélites que como no comprenden el movimiento lo demonizan.

Dicho todo este rollo, no sé a dónde va todo esto y donde nos va pillar a nosotros pero es necesario.