Ente'l dolcu y la media manga

Los llunes post electorales tienen siempre un estrañu tastu a resaca onde nun falten nin siquiera’l remor y el propósitu d’enmienda tan habituales nes resaques ordinaries. Cualquier votante asturianu d’izquierda sabe a qué me refiero, pero probablemente non cualquier llector va saber qué entiendo yo por “votante asturianu d’izquierda”.
Mándome d’esi significante pa referime al votante d’izquierda que considera Asturies como un país coles sos diferencies non sólo llingüístiques y culturales sinón tamién polítiques, una y bones el devenir de la llingua y la cultura asturiana nun ye independiente de cómo se configuren los poderes públicos y siendo, amás, qu’esi devenir vuelve incidir na cosa pública. Sé que ye una frase demasiao llarga, y que más d’ún va refertame que nun diga simplemente “nacionalismu d’izquierda” o “asturianismu d’izquierda”. Pero ye que nun ye lo mesmo, anque por comodidá acabemos, yo’l primeru, emplegando eses dos espresiones. Igual qu’hai nacionalistes que nun son votantes nacionalistes, tamién hai votantes nacionalistes que nun son nacionalistes. Pero esa nun ye agora la cuestión.
Digamos, pa entendenos, qu’un votante asturianu d’izquierda nun va tar dispuestu a apoyar cualquier opción nacionalista y muncho menos va dar l’apoyu a una opción nacionalista de derecha o interclasista. Mesmo si hubiera una opción claramente posicionada y alliniada cola izquierda, esi votante diba fiscalizar y castigar cualquier mínimu desplazamientu del discursu hacia la xenofobia. Tamién diba vese incómodu confiando’l so votu a una candidatura dependiente d'un proyectu común pa tol reinu d’España por muncho que visibilizara un ciertu plumax asturianista. Creo qu’esi votante hipotéticu busca un equilibriu improbable ente la música asturiana y la lletra de la izquierda. Folksinger in fabula.
Yo soi esi votante, y nun cuento ser l’únicu, anque nun soi pa constatar si pertenezo a un colectivu mui grande o mui pequeñu. A la hora de dar el votu, mándome d’una intransixencia que quiciás se fundamente na creyencia de que’l compromisu políticu nun ye sólo nin principalmente votar cada equis años. Soi minoría ente la minoría, pero sopeso esa papeleta como si fuera a decidir el futuru d’un imperiu. Y fáigolo consciente y arguyosu de vivir instaláu na contradicción permanente.
Como’l tiempu tamién pesa, y pa meyor, cuantayá qu’asumí la mio condición de votante d’Izquierda Xunida. Ye asina, y ye dalgo que nun me provoca nin arguyu nin vergüenza. Como nun podía ser d’otra manera, si ye que nun m’espresé mal na homilía precedente, sentíme muncho más cómodu cuando pudi votar a Izquierda Xunida en coalición col Bloque por Asturies. Como tampoco podía ser d’otra manera, acusé recibu de la relaxación cola qu’Izquierda Xunida afrontó estos últimos años la política llingüística, cuantimás cuando foi tan evidente qu’hasta’l so candidatu Jesús Iglesias tuvo la valentía de reconocelo. La marcha de Valledor y la ruptura col Bloque por Asturies paeciéronme, sicasí, indicadores preocupantes, muncho más preocupantes que’l turdeburde medio marcianu col PCA y el PCE. La posibilidá de que Valledor encabezara una candidatura conxunta del Bloque por Asturies y Unidá Nacionalista Asturiana abultábame interesante pero peligrosa. Qu’esa candidatura la encabezara Rafa Palacios decidióme a cambiar la mio intención de votu per primer vegada en más d’una década.
Yá cuando la última campaña electoral fixi pública la mio simpatía por Palacios como cabeza de cartel de la izquierda asturiana. Al marxe d'otres consideraciones que nun tengo por qué compartir nin dexar de compartir, creo que pue ser el rostru y la voz al frente d'un proyectu y d'un equipu. Nun tengo mui claro qu'esistan esi proyectu y esi equipu, pero pagaba la pena esficiase esta vez na candidatura, seique un poco precipitada pero aparentemente honesta, de Bloque por Asturies-UNA, y de pasu tamién, por qué non, canalizar la rocea énte l'entreguismu escesivu d'Izquierda Xunida.
Nun sé cuántos de los votantes, militantes o candidatos de Bloque por Asturies-UNA teníen previsto'l cursu d'acción pa siguir si s'algamaba un diputáu'l 22-M. Personalmente, prefería nun lo pensar. Como nun ye'l casu, prefiero siguir ensin pensalo, pero nun puedo evitar dedica-y un par de segundos y unes llinies: ¿intentaríase un averamientu a Izquierda Xunida, cola autoridá esta vegada de representar dalgo más qu'unes sigles, o volvería a xugase a ser la conciencia infeliz d'Asturies, sólo que con cargu electu? Como digo, nun ye esi'l casu, pero pémeque la cuestión ye importante.
Bloque por Asturies-UNA nun llegó a los 7000 votos, aproximao un 1%, y ye poco lo que consuela recordar agora les variables independientes qu'influyeron, y muncho, nesi resultáu. El tiempu pasa: ¿hai marxe pa invertir otros cuatro años nesi proyectu? Si l'aspiración ye convertise na fuerza hexemónica de la izquierda asturiana, por poco razonable qu'eso seya a la vista de la situación actual, entós sí merez la pena'l gastu. Si la intención ye sumar voluntaes a un proyectu d'izquierda asturiana, compartiendo espaciu con Izquierda Xunida, entós dame que llegó'l momentu de plantegase otres opciones. Eso ye, pamidea, lo que'l votante asturianu d'izquierda tien que tar decidiendo agora, y pa ello ye preciso que'l Bloque por Asturies y UNA seyan bien claros nos sos planes de futuru y nes sos aspiraciones. Pol bien de toos. Depués, yá fairá caún lo que-y dea pola gana.