De verdá, ún yá nun tien nin la edá nin l’humor pa según qué coses, y una d’eses coses ye l’andar desmintiendo bilordios. Dalgo inútil amás de costoso. Cuantimás cuando nin xuntando tol ego del mundu dexa’l tema de ser pueril, como cuasi tolo qu’afecta a la microsocioloxía de la nuesa lliteratura.
Sicasí, por pueril que seya l’asuntu, hai dalgo que nun me presta gota que s’utilice ensin pidime a lo menos la opinión: el mio nome. Por aquello de que ye lo único que me pertenez, en tolos sentíos, quixera ser yo’l que decide cuándo usalu y cuándo non. Y si pinta qu’hai dalguién per ende al que’l mio nome-y paez dignu de creitu, tanto que nun dulda n’invocalu en beneficiu propiu, tamién quixera enteralu de que, por muncho que m’afalague, la situación nun cambia un res. El mio nome sigue siendo míu.
Y asina quiero que siga siendo. Si l’autor d’un determináu artículu d’opinión (llamalo crítica lliteraria diba ser escesivo) se siente tan inseguru de les sos propies reflexones que necesita dicir: “Oi, ¿sabes quién me felicitó? Xandru Fernández”, quixera saber si ye consciente d’ónde se mete. Mayormente, porque nun ye verdá. Y porque, insisto, ún yá nun tien nin la edá nin l’humor p’andar templando gaites.
2 comentarios:
Pues yo presumo de ser amigu tuyu sin el tu permisu. Eso sí, solo escribo en el mi myspace y de tí nunca fale tovía.
Un abrazu
Y yo de ser amigu tuyu, Larry. Precisamente por eso sabes qu'a veces salme la vena macarra. Pero con que garre'l mensaxe'l que lu tien que garrar, yá me val. Prefiero poneme faltosucu nun blog que llegar a otres situaciones más "delicaes"...
Otru abrazu.
Publicar un comentario