Seres decepcionantes

La conclusión fatal a la que llega ún depués de ver Terminator Salvation ye la de que John Connor ye imbécil. Yá taba claro na tercer parte de la saga, pero fuimos munchos los que decidimos qu’esa tercer parte nunca nun esistiera. Con esta cuarta, hemos rendinos a dos evidencies: el cretinismu de Connor y la xenialidá de James Cameron, creador de la serie y director de les dos primeres entregues.
L’aciertu de Cameron nel filme orixinal foi evitar mostrar a John Connor como adultu y cabezaleru de la resistencia contra les máquines. Al mesmu tiempu, focalizaba l’interés na figura de Sarah Connor, la ma de John, fundiendo nun mesmu personax l’arquetipu católicu de María col relatu paganu de la Capiellina Collorada. Cameron tuvo qu’intuir que Connor nun podía nunca tar al altor de lo que l’espectador de la primer película esperaría d’él (una llección que toos pudimos deprender de Kazantzakis y la so revisión de la figura de Xesús, o cuando menos de l’adaptación cinematográfica que rodó Martin Scorsese), y fixo una segunda parte onde la exa de l’acción vuelve a ser la ma. El que diseñó les dos siguientes entregues, en cambiu, nun sabía muncho de mitoloxía comparada.
John Connor ye decepcionante. Y ye difícil que pudiera ser d’otra manera: siempres nos miró dende distancies astronómiques, invisible na escuridá del firmamentu nocturnu. Ocurre dalgo asemeyao con escritores a los qu’ún almira y que, de sópitu, empérrense en mostranos la so propia biografía como trama novelesca. L’autoficción ye un empeñu al altor de Proust o de Chateaubriand, pero mui pocos autores son pa escalar tantos pisos.
Na mayoría de los exemplos salvables d’autoficción, axúntase la maestría técnica cola creación d’un universu de sentíu onde lo de menos ye la serie d’episodios que vivió l’escritor. Ye’l casu de Philip Roth en Los hechos y Patrimonio, o’l de Rick Moody en El velo negro, por nun salir del ámbitu norteamericanu. Nun ye’l casu de Jonathan Franzen en Zona fría.
Jonathan Franzen ye, y seique va ser por siempres, l’autor de Las correcciones, una obra que lu convierte irremisiblemente en dalguién interesante pal llector aficionáu a calar nes intimidaes de los novelistes. Por embargu, en Zona fría la impresión que dexa nun ye sólo la de vivir una vida sosa, sinón tamién la de nun tener vivío con muncha intensidá. Les preocupaciones de Franzen son, si non absurdes, tirando a bobes. La so acrítica aceptación del Umwelt protestante de la clase media norteamericana como natura naturans llévalu a raspiar el ridículu cuando pretende mostrase como un rebelde con causa: el suyu ye un puritanismu tan desconectáu de les motivaciones relixoses de los sos mayores que convierte n’incomprensibles cuasi toles sos decisiones. Les llectures que fai de la so propia trayectoria como ser vivu, anque contaes cola firmeza del que sabe disponer los elementos d’una historia pa qu’al final encaxen toles pieces, nun tán al altor de lo que podía esperase del autor de Las correcciones. N’otres pallabres: sabemos más de Franzen por Las correcciones que por esta abúlica autobiografía que si nun decepciona del too ye pol xeitu de dicir y pola agudeza sociolóxica de la so mirada.