El punk punxo de moda un símbolu controvertíu, probablemente’l símbolu más controvertíu de los últimos cien años: la esvástica. Apaecía nel atrezzo de los Sex Pistols, igual que, años antes, nel d’otra banda promovida por Malcolm McLaren: los New York Dolls. La solombra de la esvástica, y de la imaxinería nazi en xeneral, proyectábase peligrosamente percima de grupos como Siouxsie & The Banshees, Joy Division, Ramones, The Damned, The Stranglers... Y non sólo la esvástica o’l saludu romanu: l’españíu punk coincidió, a lo menos nel tiempu, con un bultable avance de la estrema derecha en toa Europa, y mui especialmente ente la mocedá.Claro qu’esistía tamién una fascinación más xenérica pol nazismu como fenómenu estéticu, y d’esa nun yera culpable’l punk, más bien tolo contrario: la simboloxía nazi taba na gran pantalla dende qu’entamaren los años setenta, y bien de veces en contestos recreativos, sólo aparentemente desactivaos nel planu ideolóxicu. Asina, l’ésitu masivu de Cabaret (1972), de Bob Fosse, nun foi más qu’un episodiu al que sumar, por exemplu, Il Portiere Di Notte (1974), de Liliana Cavani, o Salon Kitty (1976), de Tinto Brass. Había esvástiques per toes partes.
Yera un panorama complexu, onde, a les puertes de los años ochenta, la posibilidá d’una renazificación d’Europa nun yera nenguna tontería. El punk contribuyó en gran midida a valtar el tabú que, a lo menos en Londres, pesaba sobre la esvástica como símbolu del Mal. La dark wave afondó nesa mancadura, en determinaos casos con una seriedá que güei ñeguen los sos promotores.
Killing Joke pertenez a esi esprit de corps onde la llinia ente la provocación y la alienación ye fina por demás. Sicasí, foron capaces de producir música innovadora y suxerente. L’exemplu piqueru ye’l so primer álbum, Killing Joke, onde punxeron dalgunes de les primeres piedres (otres taben poniéndoles The Pop Group y Throbbing Gristle) d’un xéneru con futuru: el industrial. En bona midida, d’equí salieron Ministry y Nine Inch Nails.
5 comentarios:
Igual toi equivocáu Xandru, ¿pero nun tuvieren David Bowie y Brian Ferry metíos tamién nalgún rollu d'estética nazi allá pelos 70? Al menos a Bowie hai quien-y recuerda lo del saludu.
Efectivamente, Bowie tuvo implicáu nuna polémica a propósitu d'un saludu romanu, qu'él negó depués, diciendo que-y sacaren mal la foto (lo que nun quita pa que tuviera tamién mui bones pallabres pa Hitler). Hai elementos na so obra qu'apunten na mesma dirección que depués siguiríen Joy Division y compañía, y nun me refiero sólo a la época del saludu (que foi a mediaos de los 70, cuando Bowie andaba ente'l "Station To Station" y la so etapa en Berlín): los elementos ocultistes, por exemplu, que Killing Joke tamién esplotaron, yá los emplegaba Bowie de bien mozu, nos años de "Space Oddity". Tocante a Ferry, namás que me suena la que se montó l'añu pasáu por mor d'unes declaraciones suyes sobre Albert Speer, pero en cualquier casu yera dalgo qu'a mediaos de los 70 taba, como se suel dicir, nel ambiente. Hasta Clapton tuvo'l so ramalazu fascistoide.
Va siendo hora que dalguién fale a les clares de les simpatíes nazis d'Ian Curtis, lo que nun quita pa que me preste, y muncho, la so música. Cuando escuches al gafapastismu falar d'ello siempres lo ponen como anécdota estética quitándo-y fierro.
En Por favor mátame cuentan una anecdota tremenda de un cantante punk (el de los dead boys creo).
estaba todo tatuado con esvásticas, lo rajan un día por la calle y está a punto de palmarla porque el médico que lo va a operar resulta que es judio.
Muncha supuesta información sobre les simpatíes de determinaos músicos de rock pa col nazismu ye puru bilordiu, claro, pero hai otros caos en que s'axusta a la verdá, da lo mesmo qu'esa simpatía la motivara la convicción o la simple inorancia. Yo sí pienso qu'en Joy Division había simpatía sincera hacia'l nazismu, y eso pa los sos siguidores d'izquierdes ye una fonte d'incomodidá (l'intentu de Winterbottom en "24 Hours Party People", por exemplu...). Otros casos son más atribuibles a una mezclienda de les dos coses, convicción más inorancia: ehí hai que meter, creo yo, a Bowie y a tolos cruzaos del ocultismu, siguidores de Crowley y tal. Y hai un casu, claro, que si queréis pue ser el más reprochable dende'l puntu de vista éticu, que ye'l del irresponsable: el que nun peca d'inorancia nin tien nenguna convicción pero sabe cómo provocar. Yo meto nesti últimu grupu a Lou Reed.
Agora, tamién ye difícil desentrellizar toes eses motivaciones, y un exemplu ye Killing Joke: desque volvieron a los escenarios (y a grabar, y por cierto que ye una vuelta bien prestosa) el so emblema yá nun ye la esvástica precisamente: entrái en www.killingjoke.com y mirái el logo de KJ Records: ¡¡la foz y el martiellu!!
Publicar un comentario