La gran fola del country-rock espalmó na primer metá de los años setenta; a partir de la revuelta punk, los sos siguidores tuvieron que plegar les ales y resignase a navegar ente’l despreciu de la new wave y la ostentación ultra de la vieya guardia de Nashville. Hebo, ye cierto, un relativu resurdir d’esa tendencia nos años ochenta baxo la etiqueta de Paisley Underground (Green On Red, Dream Syndicate) o del llamáu cowpunk (Jason & The Scorchers, Fetchin’ Bones), pero hasta’l boom del soníu Seattle l’americana sólo cantó sotto voce.A mediaos de los años noventa, la etiqueta alt-country val pa cristianar el maridax de la xeneración del grunge coles músiques tradicionales de los Estaos Xuníos. D’una de les bandes más prometedores d’esi movimientu, Whiskeytown, va escapase’l cantante y compositor Ryan Adams, y de les manes de Ryan Adams va salir ún de los álbumes d’americana más redondos de tolos tiempos: Heartbreaker. Un álbum cenciellu nes sos aspiraciones ciertamente mundanes, centráu na idea de canción como mundu-mensax, el tipu d’álbum que compunxera Paul Westerberg si llega a nacer diez años enantes o diez años más tarde. Sobriu na concepción pero elegante na execución, Heartbreaker ye tamién la maldición de Ryan Adams: un álbum tan rotundu que nunca nun pudo igualalu.
3 comentarios:
Ye difícil superar "Strangers almanac" de Whiskeytown pero Ryan Adams tien la virtú del talentu supremu. En "Heartbreaker" demuéstralo (impresionante "Oh My Sweet Carolina" con E. Harris)Anque yo tengo cierta debilidá por "Demolition", nesti discu vien otra d'eses canciones que me marcaron pa siempre: "Nuclear".
Sigue escribiendo, collaciu, estes páxines antolóxiques sobre música. Nun tienen preciu nesti desiertu xordu. Por ciertu, a finales del mes que vien, que quedo llibre d'una gran carga, voi intentar quedar con una de les persones que más sabíen de música de tol estáu. Llegué a carteame con él fai más de 15 años...Foi la persona que me metió esti venenu duce na sangre. Vivía n'Uviéu pero agora nun sé siquiera si ta vivu...¿Tu oyisti dalguna vez "Carpeta de rock"? Si doi con él ¿interesaríate conocelu?
Siempre presta falar con dalguién que sepa de música, o meyor: que-y guste la música. Asina que seguramente sí a la segunda pregunta y non a la primera, nunca nun oyí "Carpeta de rock".
Acertáu'l comentariu y sobre too la última frase. Siempre hai cantares estupendos en cada trabayu de Ryan Adams, anque bien ye cierto que toos los que lu siguimos tratamos d'atopar esi album perfectu que nos lleve de nuevo a "Heartbreaker".
De los siguientes trabayos d'elli, "Gold" ye'l que lu conectó col gran públicu, sicasí pa mi "Love is Hell" ye un album tamién mui a tener en cuenta.
Publicar un comentario