Un paradigma artísticu (lliterariu, musical, cinematográficu) acaba afrontando en dalgún momentu la cuestión de “lo clásico”. Entendiendo esti conceptu non a la manera hegeliana, con vocación de coincidencia exemplar ente lo interior y lo esterior (ente’l ser y l’apariencia), sinón a la manera nietzscheana, como configuración puramente convencional pero qu’en calidá de convención pon en xuegu toles fuerces creatives que conflúin nuna época. Tamién nel rock se tien formulao la cuestión d’un clasicismu plausible, y tamién convencionalmente s’asume un conxuntu más o menos borrinosu de nociones comunes a propósitu de lo clásico.Ye comprensible que fuera na década de 1990 cuando la reformulación d’unos parámetros de clasicismu se-y fixo al rock más necesaria: la década anterior, en parte debío a la resaca de la revuelta punk, en parte por acio del programa alienante asumíu pola industria discográfica y los mass media, fixera verosímiles los augurios sobre la “muerte del rock” y a la postre punxera tamién les primeres piedres (dientro de los circuitos alternativos) pa una corriente renovadora que, a diferencia de lo que representara la revuelta punk, nun partía del despreciu sinón de la reivindicación d’una yá llarga tradición musical. El nuevu clasicismu taba representáu por bandes como Pearl Jam, Screaming Trees o Afghan Whigs, pero tamién por Guns N’ Roses, Primal Scream y, sobre too, The Black Crowes.
The Black Crowes reediten un tipu de soníu que bebe, fundamentalmente, de Humble Pie y de The Faces, pero desprovistu en tou casu del aldu esperimental, incluso fundacional, que pudiera tener pa estes bandes. En 1992 ponen en circulación The Southern Harmony And Musical Companion, con pieces como “Remedy”, “Thorn In My Pride” o “Black Moon Creeping” onde los estilemes del hard rock y del rock sureñu de los setenta nun s’asumen con espíritu de revival sinón como programa estéticu. El so apueste foi, amás, refrendáu por un ésitu rotundu y masivu, condición irrenunciable pa cualquier propuesta clasicista en cualquier ámbitu.
2 comentarios:
Gran discu anque yo quédome con Shake your money maker. Siempre me llamron l'atención los Black Crowes: nacieron nuna época dominada pol grunge, el rollu alternativu,el funk metal, etc., y ellos, pasando del tema, vuelven a los raigaños sesenteros y a la estética hippie que polos años 90 nun taba, precisamente, a la mode. Nun puedo, entós, dexar de ver na pose de Chris Robinson un toque comercial bien planeao. Él ye un hippie-dandi bien vestíu y axeitáu. Inda asina, los Black Crowes son la típica gran banda de rock americana. Y tanta influencia tienen de xente como Free, Lynyrd Skynyrd, los Rolling (los riffs de Keith Richards tán mui presentes) y, sobre too, los Allman Brothers, como de los mismísimos Faces o Aerosmith. La llista sería infinita porque beben d'unes cuantes fontes. Pero, en xeneral, definiríalos como una banda de hard rock sureña, hermanos pequenos de Mountain y Little Feat.
Ye increíble les coses que pues llegar a decir de un discu. Filósofo teníes que ser. Yo puedo resumilu en cincu pallabres: UN DISCU DE PUTA MADRE.
Eso sí, de 1992, yo quédome con el FEAR OF THE DARK de Maiden, esi sí que fue como decimos en la mi pandilla MGQLPV (más grande que la puta vida).
Publicar un comentario