lunes, 19 de mayo de 2008

Pearl Jam: "Ten" (1991)

De caúna de les canciones que componen Ten, el primer álbum de Pearl Jam, ye fácil escribir bien de páxines enllenes de xeneralidaes o datos cuando eruditos cuando anecdóticos. En xunto, l’arquitectura de Ten invita, en cambiu, a entruganos por aquello que lu fai singular non sólo como empiezu de la carrera de la banda de Seattle sinón tamién dientro del panorama musical de la época y del supuestu movimientu musical (el grunge) en que s’enmarca.
Nun ye fácil, nostante, dar coles claves. Si Ten guarda dalguna similitú col arcu espresivu del grunge, les mayores analoxíes caen del llau de les lletres (incestu, asesinos en serie, homeless, l’adolescente marxináu que se vuela la cabeza delantre los sos compañeros de clas) que del puru conceptu musical. Aparentemente, tien tan poco que ver col llau más metal del grunge (Alice In Chains, Soundgarden) como col so llau más punk (Mudhoney, Nirvana). Los raigaños del so soníu remóntense a Led Zeppelin y Jimi Hendrix, pero sobre too al maxisteriu de Neil Young, al que Pearl Jam acompañarán nel escenariu y mesmo nel álbum Mirrorball sustituyendo a Crazy Horse. Sicasí, lo específico de Pearl Jam y la so principal aportación nesti primer álbum, lo que va convertilos n’imprescindibles nel paisax musical de los años noventa, ye la voz d’Eddie Vedder, comparada davezu coles de Jim Morrison y Tim Buckley y protagonista indiscutible de toes y caúna de les sos composiciones.
Ente les canciones, munches que van devenir himnos d’estadiu: “Alive” (llevantada namás que sobre un solu de guitarra y un estribillu), “Once” (la más cercana al soníu de los sos maestros Hüsker Dü), “Even Flow” (no musical, un homenax a Jimi Hendrix) y “Jeremy” (una de les mayores creaciones de Pearl Jam en tola so carrera, al empar qu’una de les interpretaciones más memorables d’Eddie Vedder).

2 comentarios:

Anónimo dijo...

Unu de los grandes discos de la mio vida. 18 añinos (y melenes) tenía cuando salió y sigue prestándome como'l primer día. Pude dir velos, por fin, fai dos años al Azkena rock de Vitoria y nun me defraudaron. Como oro en pañu tengo el vinilu de Temple of the dog, el grupu que foi el disparaderu, xunto a Mother Love Bone, de los Pearl Jam, onde taben S. Gossard, Jeff Ament, Matt Cameron (xenial y futuru batería de los Pearl)y el gran Chris Cornell (Eddie Vedder namás canta una canción a duu con Cornell). Como anéudota nun voi cuntar d'áu vien el nome de Pearl Jam (la famosa mermelada de la güela de Eddie bla bla bla) El nome del discu, Ten, punxéronlu n'homenaxe a un xugador de baloncestu que-yos prestaba en forma: Mookie Blaylock, y que llevaba'l dorsal 10. Qué tiempos aquellos!!

Xandru Fernández dijo...

Sabrás, de xuru, que Mookie Blaylock yera'l nome que diben pone-y al grupu enantes de decidise por Pearl Jam. Por ciertu, yo tamién tuvi nesi conciertu nel Azkena. Tremendu.