
A los marcianos siempres diba propone-yos Led Zeppelin III, un d’esos que solemos llamar “trabayos de transición”, anque nesti casu’l calificativu namás que-y provenga del llugar qu’ocupa cronolóxicamente ente les dos grandes obres arriba citaes. La lleenda diz que la metá de les canciones d’esti discu nacieron d’unes vacaciones de Robert Plant y Jimmy Page nuna casería de Gales onde nun había electricidá y qu’eso esplicaría que fueren de corte acústicu. Seique había otra casa paecida onde Humble Pie compunxeron Town And Country, y otra onde Jethro Tull parieron Benefit... Que nel ambiente musical inglés se respirara un aire d’introyección pastoril, audible nos discos de Pentangle, Donovan y Fairport Convention, cuido que pudo tener tamién la so importancia.
L’álbum abre con un clásicu del hard, “Immigrant Song”, de resonancies vikingues, y contién pieces como “Celebration Day”, “Since I’ve Been Loving You”, la balada “Gallows Pole” y el collage “Hats Off To (Roy) Harper”. Los cuatro tripulantes del dirixible tán (como diría Michaleen Oge Flynn) “homéricos”: la voz de Plant álzase cola primacía ente los grandes aspirantes del momentu (Stewart, Marriott, Daltrey), Page y les sos guitarres paecen fundise nuna sola criatura mutante, Jones asciende de categoría (de baxista a home-orquesta) y Bonham ruempe por fin coles estructures d’acompañamientu de les que pocos bateríes de la so escuela foron pa safase. El terceru de Led Zeppelin ye, por fin, una obra propia, non sólo la esibición mayestática de cuatro músicos superdotaos reescribiendo’l blues clásicu, lo que, sicasí, nun yera poco.
6 comentarios:
Led Zeppelin, qué gran grupu.. la verdá.
Del equipu de DAQUIEN ESNALÓU... you sou'l Beatlemaníacu, pero Cernícalo Furioso ía un fan tremendu de Led Zeppelin.
Apunto'l nome de la peli, que nun conocía. Munchas gracias por apurrinosla
Gallows Pole una balada?? Discrepo, compañeru, pero comparto la eleción del discu ;-) Yo diría que ye más folk que blues, pero ye igual, mola, mola.
Salú
"Gallows Pole" ye orixinariamente una balada, polo menos apaez nel cancioneru de Child con esi calificativu, anque col títulu de "The Maid Freed From The Gallows". Otra cosa ye que la versión de Led Zeppelin nun tenga muncho que ver col conceptu más pop (o incluso heavy) de la "balada". Y sí, CDT, coincido en que'l llau "folk" pesa más nesti discu que'l llau "blues", a pesar de "Since I've Been Loving You" y del medley final de blues clásicos.
Bienveníos los dos.
Qué si yo, compañeru, ye que tengo'l concetu de les balaes como una cosa romántica y babosa. Y el cantar esi ye un puntu intentando convencer al verdugu que nun lu cuelgue.... ufrez-y hasta la hermana! y al final cuélgalu y descoyonase d'él.
Tien pinta de ser un cantar popular, menudos debíen ser los anglos!
Salú
Hasta onde yo sé (que nun ye muncho), la versión de Led Zeppelin ye la única qu'inclúi esi final gamberru, nes demás que yo conozo nun ta tan claro que cuelguen a la moza.
Por si t'interesa o-y interesa a daquién, equí tán les lletres de les balaes recoyíes por Child. "Gallows Pole" ye la 95.
http://www.sacred-texts.com/neu/eng/child/index.htm
Un saludu.
joer, pensaba que yera un mozu xDDD De toles maneres claro nun pue tar nunca, tando escrito d'esi xeitu ;-)
Publicar un comentario