martes, 1 de abril de 2008

Jethro Tull: "Aqualung" (1971)

Ye célebre’l tratu que recibió Jethro Tull de la censura franquista: Aqualung tardó cinco años en publicase n’España (en 1976, depués de morrer Franco) y, con too y con eso, nuna versión mutilada que diba convertise n’oxetu de coleccionista, una y bones el tema “Locomotive Breath” desapaeciera pa ser sustituíu por “Glory Row” (un cantar que sólo apaeciera en single y que nun se correspuende nin cola formación que grabó Aqualung nin col so espíritu, n’absoluto). Nun acaba equí la cosa: l’álbum de Jethro Tull Living In The Past, un falsu recopilatoriu editáu en 1972, pasó tranquilamente la censura, ensin qu’importara un res qu’ente les sos pistes figurara, precisamente, “Locomotive Breath”.
¿Y qué tenía d’especial “Locomotive Breath”? Según paez, el llinguax porcaz, al dicir de los censores franquistes. La cuestión relixosa, central nel álbum ensembre, fuera determinante na recepción d’Aqualung nel Reinu Xuníu, pero n’España les preocupaciones debíen ser más de tipu sexual (como la famosa invitación que recibieron los músicos del grupu a “cubrir les sos vergüences” nuna actuación en Barcelona).
Y claro qu’hai sexu n’Aqualung. De fechu, el vagamundu que-y da nome al discu tien xeitos d’un Humbert Humbert veníu a menos, igual que la “Cross-Eyed Mary” del segundu corte guarda un ciertu paecíu con Lolita. Pero más ecu tuvo, na época, la profesión de fe anticlerical que percuerre tol álbum y especialmente clara en “My God”, “Hymn 43” y “Wind Up”, amás de na cubierta del discu, onde pue lleese esta declaración fácil d’atribuir a Ludwig Feuerbach: “A lo primero l’home creó a Dios”. Sicasí, nun ye un álbum conceptual, como sí diba selo’l siguiente trabayu de Jethro Tull, Thick As A Brick. Aqualung ye nin más nin menos qu’una escepcional colección de canciones arrincaes al talentu d’Ian Anderson, probablemente’l cantante-compositor más infravaloráu de tola historia del rock.

2 comentarios:

Nodicho dijo...

Yo namás sé que tola vida m'encantó "Locomotive Breath" (pero nunca me paré a entender la lletra)

Xandru Fernández dijo...

La lletra cuenta la típica historia del perdedor al que la muyer lu engaña col amigu, PauPablo. Los versos finales vienen a dicir que'l que lu tien pilláu pelos güevos ye Dios.
Y bienveníu, a ver cuándo cai ún de Van Morrison...