Blue Öyster Cult: "Secret Treaties" (1974)

Dos nomes: Sandy Pearlman y Richard Meltzer. En 1967, los dos escriben crítica de rock en Crawdaddy!, una de les revistes decanes del xéneru. Los dos vienen de la Universidá de Nueva York, el primeru con una sólida formación n’antropoloxía y una reconocida trayectoria poética, el segundu con una solvente formación en filosofía y cierta sonadía nel mundu del arte de vanguardia. A Pearlman y a Meltzer pue atribuíse-yos la difusión de la espresión heavy metal pa categorizar ciertu soníu hard proviniente del blues-rock inglés (Led Zeppelin, Humble Pie, Black Sabbath). La espresión yá esistía (apaez en La máquina blanda de Burroughs, y tamién na lletra de “Born To Be Wild”, de Steppenwolf), pero la escuela crítica de Nueva York da-y unes resonancies épiques, granguiñolesques y esotériques que van facer fortuna nos primeros años de la década de 1970, anque’l soníu metal propiamente dichu tovía tarde unos años n’apaecer.
Pearlman y Meltzer son tamién los pas putativos de Blue Öyster Cult: promovieron la so creación, diéron-y un nome y una estética, escribieron lletres pa les sos canciones y parieron un monstruosu artefactu escénicu que sigue tovía vivu. Eric Bloom, Allen Lanier, Buck Dharma, Joe Buchard y Albert Bouchard foron la so formación más estable, la mesma que grabó en 1974 Secret Treaties, la obra maestra del grupu. Ocho cortes enllenos d’electricidá, ciencia ficción, escenes de guerra aeronaval y deidaes ficticies, onde la voz (Bloom), les guitarres (Bloom, Dharma) y los teclaos (Lanier) texen complexes estructures cuasi-narratives. Entamando per “Career Of Evil” (con lletra de Patti Smith) y finando per “Astronomy” (una de les pieces claves del hard rock de tolos tiempos), l’álbum algama cumes difíciles de superar en tramos como “Dominance And Submission”, “ME 262” y, sobre too, “Flaming Telepaths”. Más anecdótico ye que, pola so puesta n’escena y les referencies de dalguna de les sos lletres (“Hitler’s on the phone from Berlin / Says: I’m gonna make you a star”), fueren calificaos de nazis por dalgún periodista oligofrénicu, cuantimás siendo un grupu formáu fundamentalmente por xudíos. Otra cosa ye que, acordies con Pearlman y Meltzer, los Cult recurrieren a les técniques de representación de la política de mases, poniendo l’acentu nos elementos comunes ente esta última y el rock como espectáculu masivu (“Dominance And Submission” ye’l tema más esplícitu al respective).