miércoles, 23 de abril de 2008

Mercury Rev: "Deserter's Songs" (1998)

Deserter’s Songs ye una d’eses creaciones estravagantes, que raspien el deliriu y que, de puro brillantes, esllumen. Un discu difícil de comparar con nengún otru, porque nun suena esactamente a nada que tuvieres sentío enantes, anque esto tampoco nun ye del too asina: a dicir verdá, too nél son ecos de dalgo que yá escuchasti pero que nun sabes cuándo nin en qué situación. Pudo ser nuna película americana, seique en blanco y negro, y mui probablemente con trenes y con ñeve, o al meyor foi nun cuentu de John Cheever (¿por qué pienso en John Cheever siempres qu’oigo esti discu?).
Nun hai ruíu en Deserter’s Songs. Mercury Rev vuélvense equí too melodía, serenidá, mesmo cuando xuxurien versos suicides como los de “Opus 40” (con Levon Helm a la batería: la sombra de The Band ye asina d’allargada) o ataquen dalguna de les pontes instrumentales que desurden equí y allá con ecos de camarotes de barcos fundíos. Jonathan Donahue canta con esa voz cascada que siempres paez tar ensayando xunto a un pianu baratu nel cuartu d’atrás d’una casa ruinosa, y tolos instrumentos del mundu (flauta, trombón, wurlitzer, whistle) entren a competir colos coros a la de crear un telón de terciopelos resgaos: cantares nocturnos pa da-y el remate a un sieglu decadente.

2 comentarios:

Anónimo dijo...

Conozo poca xente a la que-y guste Mercury Rev. Los 5 primeros discos son una maraviya,anque yo qu�dome col "Boces" de 1993. Si te presten los grupos d'esti estilu has d'escuhar a Gorky's Zygotic Mynci. Discos como "Barafundle" o "Spanish dance troupe" merecen muncho la pena. Y, claro ta, nun te puedes perder neng�n trabayu de los Super Furry Animals.

Xandru Fernández dijo...

Bones recomendaciones, Melandru. "Boces" seique va merecer un artículu pa él solu más alantre. Por cierto, mui pro-galés te veo...
Bienllegáu.