martes, 29 de abril de 2008

Johnny Thunders: "So Alone" (1978)

La figura de Johnny Thunders, más incluso que la so música, ta afitada nel imaxinariu del rock como’l retratu del dandy de caleya, del ánxel yonqui que protagonizara les más de les sos composiciones. Brazu derechu de David Johansen nos New York Dolls (1971-1975), fundó The Heartbreakers con Richard Hell y Jerry Nolan, anque’l primeru desertó enantes de grabar L.A.M.F. (1977), documentu necesariu pa valorar les aportaciones de Thunders a la xestación del punk americanu.
En 1978, Thunders publica So Alone, fotofixa d’un personax en movimientu que, pa en delantre, y hasta la so muerte en 1991, sólo va dexase prindar en discos fragmentarios y bootlegs de pésima sonoridá. So Alone abre col instrumental “Pipeline”, un tema de la banda de surf The Chantays, pa darréu dar pasu a una de les canciones más dures y emocionantes de tola carrera de Thunders: “You Can’t Put Your Arms Around A Memory”, un poema que fala de vacíos, de nueches ensin fondu y soledaes que nun repulguen. Sigue otra versión, esta de The Shangri-Las: “Great Big Kiss” (con Patti Palladin faciendo coros), una parodia, un guiñu a la gayola del rhythm & blues d’enantes de la heroína (n’España fixeron Burning una re-versión baxo’l títulu “Es especial”). “Ask Me No Questions” (con Peter Perrett a la guitarra) ye una pieza cien por cien Thunders, igual que “Leave Me Alone” (que Thunders yá grabara colos New York Dolls baxo’l títulu “Chatterbox”), mientres que “Daddy Rollin’ Stone” (acompañáu por Phil Lynott y Steve Marriott) ye otra versión, esta vegada d’un tema d’Otis Blackwell. “London Boys” vien a ser un esperimentu, los Sex Pistols con Thunders llevando la voz cantante (Steve Jones y Paul Cook collaboren en da-y verismu al asuntu), y “(She’s So) Untouchable” ye otra d’eses balaes thundersianes que tanto van influir nes composiciones de Paul Westerberg. “Subway Train” y “Downtown” son los broches del discu, dos temes escritos a medies con David Johansen, de vuelta al estilu acanalláu y borde de los New York Dolls.

2 comentarios:

Anónimo dijo...

Bon comentariu, collaciu. Ye, ensin dulda, el meyor discu de Johnny, anque hai que tamién tener en cuenta el L.A.M.F con The Hearbreakers (menuda banda: Richard Hell, Jerry Nolan, Walter Lure)y que comparten nome colos impresionantes "hearbreakers" de Tom Petty. Al paecer anda perehí un acústicu de Thunders que va salir pal veranu. Va ser interesante escuchalo. Será daqué parecío a un volcán n'erupción que nun mete ruxíu...

Xandru Fernández dijo...

Habrá que tar atentos, Melandru. Atentos y desconfiando, que yá nos tienen metío tantu garrafón disfrazáu de bootleg...