¿Pue espresase una identidá nacional al traviés del rock? ¿Ye dable representar musicalmente les señes d’identidá d’un pueblu o d’un país? Entendiendo que’l de nación ye un conceptu modernu, y qu’igual de moderna ye la construcción de les identidaes nacionales al traviés de los más diversos mecanismos de representación, tamién hai qu’almitir que’l rock, como familia musical, más que como xéneru o estilu, ye refractariu abondo a los sentires patrióticos, anque eso nun quita pa que pueda servir de plataforma pa inyectar nes audiencies cualquier tipu de soflama o ideoloxía. Bien ye verdá qu’esiste la subfamilia llamada americana, igual que la etiqueta brit-pop, pero nun dexen de ser casos nos que’l referente ye más iconográficu que musical, cuando non descaradamente comercial.Na primer metá de la década de 1970, cuando’l rock americanu recurría a les bases de la música country pa independizase de la dominación británica (y safase, de pasu, del dominiu del soul nes ondes radiofóniques), n’Inglaterra desplegábase un movimientu asemeyáu de rebusca na tradición que, sicasí, alpenes llogró tiñir de británico un equilibráu mestizax de blues, rock, jazz y folk. Nesti turbón pseudo-identitariu, del que formen parte bandes como Jethro Tull, Humble Pie o Led Zeppelin, ye inevitable destacar a Genesis como la más espresiva de “lo inglés”, igual qu’hai qu’anotar cómo lo inglés nun ye sólo, equí, la recreación de melodíes tradicionales o la so fusión con estructures pop, sinón la reconversión de referentes de la cultura lliteraria y de la historia d’Inglaterra.
Foxtrot ye la obra clave de Genesis y aquella onde más apreciable ye l’equilibriu ente’l talentu interpretativu y les (seique escesives) ambiciones compositives. Non tan anglocéntricu como’l sucesivu Selling England By The Pound (1973), l’álbum contién sicasí abondes referencies al imaxinariu lliterariu d’Inglaterra (hai nél ecos de Dickens, de T. S. Eliot y de George Orwell), especialmente audibles nos temes “Get ‘Em Out By Friday”, “Can-Utility And The Coastliners” y la llarga suite “Supper’s Ready”. El númberu de ciencia-ficción qu’abre’l discu, “Watcher Of The Skies” (inspiráu nun relatu d’Arthur C. Clarke), marca la sonoridá de la obra ensembre, una densa superficie de melotrón (Tony Banks) onde van pingando les notes del baxu (Mike Rutherford) y onde la voz de Peter Gabriel ye l’absoluta protagonista.
2 comentarios:
Les identidaes (nacionales o non) pueden espresase de varies maneres. Nel casu d’Asturies, inda teniendo una de les meyores canteres de grupos y solistes pop-rock del estáu, la música tradicional (y tolos sos derivaos) tien, guste o non, esi estatus identitariu incuestionable, averáu mayoritariamente a movimientos nacionalistes (anque llueu, too hai que dicilo, esta xente nun vote…). Ye verdá que los músicos de rock nun son mui amigos de la palabra “patria”, pero nun lo tengo claro. Munchos nun fairán apoloxía del so país pero tampoco reniegan d’él. Viénenme nun momentu dos imáxines a la tiesta: F. Mercury envueltu na bandera inglesa nun conciertu cantando We will rock you y a los Sex Pistols con “pegates” de la bandera hasta nel culo (y eso que foron el grupu mas irreverente de la historia…) Nun tocó J. Hendrix l’himnu americanu nel festival de Woodstock?. Aparte de los gaiteros del aytu. d’Uviéu (que dios los acoya na gloria de los xordos) ¿oyisti a dalgún gaiteru asturianu tocando l’himnu d’España? ¿Nun ondeaben la bandera de la Unión los Allman Brothers, Lynyrd Skynyrd, la Credence, Molly Hatchet, etc.? En fin, esto daría pa un llibru. Por ciertu, pa mi el grupu inglés por escelencia sería The Kinks. “lazing on a sunny afternoon…” Un saludu.
Como dices, daba pa un llibru y hasta pa dos, Melandru, tan certeru como siempres. Lo que pasa ye que la mio pretensión yera ciñime al formatu álbum (música grabada), ensin entrar nel aspectu escénicu del rock, onde ensin dulda nenguna tán dellos d'esos exemplos que tu pones (Queen ye paradigmáticu, Sex Pistols pémeque non tanto). Lo que llamamos música folk (música tradicional... o non, a veces basta con que suene a dalgo reconocible como tal) tien esi componente de manera clarísima, pero n'otros casos la cuestión vuélvese escura. Les escepciones vense nel repliegue americanu de primeros de los 70, Allman Brothers etcétera, pero poques más hai. Efectivamente, l'Arthur de los Kinks podía tar ente elles.
Otramiente, anque nun lo creas, sí oyí a una banda gaites asturiana tocar l'himnu d'España...
Un saludu.
Publicar un comentario