Mientres que la etiqueta heavy metal tien los sos oríxenes na crítica musical neoyorquina, el soníu al que va aplicase esi calificativu tien los sos raigaños nel blues-rock británicu. Too ello nun quita pa solliñar el nome de Jimi Hendrix como ponte imprescindible ente’l blues-rock y la psicodelia californiana: la pasión que Hendrix espertó ente dalgunos músicos mozos de la zona de San Francisco preparó’l tarrén pal desembarcu nos Estaos Xuníos de Humble Pie, Led Zeppelin y Black Sabbath.Asina, ensin ser una certeza absoluta, tampoco nun ye del too desacertao afirmar que’l heavy metal entamó col primer álbum d’un trio de San Francisco que s’atrevía a versionear el “Summertime Blues” d’Eddie Cochran fertilizándolu con un riff de Jimi Hendrix. El trio formábenlu’l cantante y baxista Dickie Peterson, el guitarrista Leigh Stephens y el batería Paul Whaley, una formación que duró menos que’l nome y la influyencia de la so música: Blue Cheer. Vincebus Eruptum tien muncho de jam session, la producción ye anti-producción, los reverberos y la distorsión superen cualquier cosa que se tuviera grabao hasta entós, y anque namás fuera pol citáu “Summertime Blues”, la versión de “Parchment Farm” (orixinal de Mose Allison) y el tema de Peterson “Second Time Around”, yá yera un discu pa pasar a la historia. Nél conflúin, namás qu’unos minutos, el blues-rock de The Yardbirds y Cream cola actitú punk de los coetáneos The Stooges y MC5. D’él beben, en cantidaes industriales, proyectos como Queens Of The Stone Age, The White Stripes y Wolfmother.
5 comentarios:
Ayeri saludévos nel aparcamientu del Calatrava (a.k.a el Centollu) y quedasti con cara circunstancies. Soi la to estudiosa (Pablo X. dixit), que nos conocimos cuando Gogol Bordello en Xixón.
Por ciertu, aprovecho pa date les gracies polos descubrimientos musicales, que tengo la mulina a tolo que da.
Otru saludu (esti con más info)
Gracies, Laura, pol eufemismu: "cara circunstancies" quier dicir, nel mio casu, "andar a uves", que ye lo que suelo facer la metá de les veces. Yo siempres digo (pero naide nun me cree: ye la cruz de los hipocondriacos) que sufro d'un trastornu que se llama "prosopognosia": reconozo les cares familiares muncho depués d'habeles visto. Pero esto tamién ye un eufemismu: nel mio pueblu, llámase "tar como una teya".
Un abrazu,
Xandru.
A min fáime muncha gracia de que salga n'escena siempre esti discu de Blue Cheer como'l primer discu "heavy" de la hestoria. Como si hubiera una definición musical del términu que nos llevara por gracia divina al Vincebus eruptum. Nos años 60 hai infinidá de bandes y solistes qu'unu podría meter nel sacu del "hard rock" pero parezme que si el "heavy" ye una evolución más dura del "hard" la primera banda heavy de la hestoria sería, ensin dulda, Black Sabbath, con esi xeniu de la guitarra que ye Toni Iommi (por ciertu, un fan acérrimu de Django). Agora mesmo viénenseme a la cabeza ciertos nomes que podríen ser significativos. Por si nun lo sabes, el primer discu de Iron Butterfly titúlase "Heavy" y ye de 1967. Vaya coincidencia, eh? Los 3 primeros discos d Sttepenwolf, toos d 1968, tán enllenos de bon hard rock igual que'l "Tons of Sobs" de Free, tamién del 68 y, como non, del "Shades of Deep Purple". Amén de la peña de Detroit: Mitch Ryder, Alice Cooper, The Stooges o MC5 col discu que pa min ye unu de los más rompedores y brutales de la hestoria: "Kick out the Jams" de 1969. Jimi Hendrix, Vanilla Fudge, The Doors, Cream, los Zeppelin, la llista nun acabaría. Quiero dicir, los términos con que s'expliquen les coses, delles veces nun son tan claros. El "Summertime blues" de los Blues Cheer ye una auténtica bomba pa la época pero non más que'l "Break on through" de los Doors, el "Summertime" de Janis Joplin, el "Keep me hanging on" de Vanilla Fudge, el "In a gadda da vida" de Iron Butterfly, el "Hush" de Deep Purple, el "Spoonful" de Cream, el "I'm going home" de Ten Years After, etc., etc., etc., Por ciertu, nun sabía que na lliteratura hubiera tamién groupies..jaja.
Un saludu, rapazón
Home, Melandru, el "Heavy" d'Iron Butterfly tien tanto de heavy metal como yo de católicu apostólicu y romanu. Y en serio te digo que me da lo mesmo si'l primer discu de heavy metal foi esti o cualquier otru. Personalmente nun creo que heavy metal seya una versión más dura (¿más hard?) del hard rock, porque nun-yos veo la diferencia. Son sinónimos hasta ciertu puntu. ¿La razón? Que "heavy metal" ye más una etiqueta sociolóxica (de cultura xuvenil o, como se dicía antaño, de "tribu urbana") que musical (otra cosa ye "metal", a seques, pero pa eso 1968 ye demasiao pronto). Cuando los heavies de los 80 s'apuntaron a la NWOBHM, quedáronse cola etiqueta pa designar a les bandes d'esta fornada, y lo de hard quedó pa los dinosaurios de los principios. A primeros de los 80 tovía se daba cierta ambigüedá (propiciada, tamién ye verdá, pol fechu de que Black Sabbath foi l'únicu de los grupos pioneros que s'adaptó al canon del doble bombu). A Black Sabbath dáse-y una importancia esaxerada pol usu del tritonu (el "diabolus in musica"), pero nun hai que sobrevalorar esi intervalu como "marca" del heavy metal (¿ye heavy metal la sintonía de Los Simpsons?).
Y cambiando totalmente de tema: ¿toi yo confundíu o hai que date la norabona? ;)
Tamos d'alcuerdu entós en que los términos son confusos non solamente pa una definición de "heavy" sinón que tamién pa otros xéneros del rock. El discu "Heavy" de Iron Butterfly tien de significativu, sobre too, el nome, que parezme quier marcar una tendencia que va romper colos cánones precedentes. Ta claro que tovía nun suenen a Sepultura pero dexen claro qu'a la bestia tán saliéndo-y dientes nuevos. Los términos igual que las definiciones pémeque varíen dependiendo de la época y les circunstancies. Si viviéramos nun mundu onde namás que suenen bandes como Megadeth, Anthrax o Slayer, ¿cuál sería la definición del estilu de Black sabbath si naciera agora? ¿Slow/tender rock? Más complexu ye lo del "diabolus in musica",la cosa nun entama con Robert Johnson o los Zeppelin. Hai que dir, digo, muncho más atrás, a les cueves, como poco, anque entós nun lo imaxinaran como agora nos lo pinten, que yo tampoco nunca nun lo vi. Ahí sí qu'hai pa un bon llibru. Y cambiando de tema y de discu: puedes tar confundíu, nun lo sé, tar toi de norabona, acabo tener dos fíos: una hipoteca pa 30 años y una criatura que me llibró del sicoanalista (que non siquiatra). Nada que cualquiera nun pueda tener.
Publicar un comentario