miércoles, 29 de octubre de 2008

King Crimson: "In The Court Of The Crimson King" (1969)

Escuché esti discu per primer vegada’l día que cumplí quince años. Yera 1985. Daquella, la música que se sentía pela radio (sacante la heroica Radio 3, y poco más) taba absolutamente dominada pol sintetizador y el saxu. Pela cueta, nel primer álbum de King Crimson los timbres que llamen l’atención son teclaos y vientos d’otru xeitu, a saber: el melotrón y la flauta.
El melotrón tuvo una curtia pero gloriosa vida. Atopó’l so sentíu conceptual cola psicodelia, yá fuera compitiendo o en simbiosis col muérganu Hammond, y col boom del llamáu “rock progresivu” la so sonoridá foi quedando soterrada baxo otres fanfarries más de moda o acabó dexenerando en soníu de chiste, al serviciu d’escesos wagnerianos de bien pocu recorríu estéticu. En determinaos momentos, contribuyó a pasaxes d’una belleza cuasi estemporánea: ye’l casu de In The Court Of The Crimson King, y particularmente del cuasi homónimu corte final (“The Court Of The Crimson King”, pa ser esactos).
L’álbum ensembre bazcuya ente’l folk y el jazz, ensin ser nenguna de les dos coses: d’ehí que significativamente entame con “21st Century Schizoid Man”, una pieza de cuasi hard rock, d’ambientación futurista y maneres orwellianes nel testu (escritu, como cuasi tolos del grupu nos cuatro primeros álbumes, por Peter Sinfield, que col andar de los años emplegará’l so talentu en face-y lletres a ¡Céline Dion!), y con un brillante trabayu de la sección rítmica (Michael Giles na batería y Greg Lake nel baxu). Les influyencies más folkies rescamplen nos temes restantes y mui especialmente en “I Talk To The Wind”, cola flauta del inspiráu Ian McDonald sobrevolando un cantar que sólo’l talentu retorcíu de Robert Fripp (guitarrista, pero sobre too dictador y alma de la banda a lo llargo de tola so esistencia) ye quien a allonxar del entornu pastoril onde paez que nació. Completen el trabayu “Moonchild” y “Epitaph”, escultures sonores irrepetibles, destinaes (¿a costafecha?) a la rotunda incomprensión de la mayoría de los oyentes potenciales del discu.

3 comentarios:

Anónimo dijo...

Otru d'esos discos eternos. Yo escucharíalo tamién con 15 ó 16 añinos de mano del mi cuñáu que me lleva precisamente 15 años. Tenía la casette nun caxón xunto a otres xoyes de los 60 y los 70, de cuando yera mozu. Aquello si que fora una experiencia. Llueu fíxeme pela mio cuenta con otros cuantos del grupu anque si tengo qu'escoyer unu quédome con esti y pa díes con sol prefiero casi el "Lark's tongues in aspic". Si mal nun entiendo, los cantantes de King Crimson foron siempre los baxistas, non?: Greg Lake, Gordon Haskell, Boz Burrell, John Wetton, etc. Buff vaya nomes!!!
Lo que te pasa a ti con Talking Heads pásame a mi con Nick Cave, rasquen al tragalos...

Xandru Fernández dijo...

A min cuasi llegó a obsesioname esti discu. Merqué la cinta esi 22 de xineru del 85 que fixi los 15, nun sabía nada d'él, pero vía'l dibuxu de la portada tolos díes de la que pasaba per delantre la tienda y taba convencíu de que dientro tenía d'haber dalgo flipante. Asina yera.
Depués, otros discos redondos de King Crimson son los de la etapa con Bruford y Wetton, y pa min más concretamente "Red" (nel que tamién collabora McDonald).

Anónimo dijo...

Un discu tan grande que ye difícil falar d'él ensin facer un ensayu. A los Crimson siguílos muncho, aínda nos sos últimos trabayos, siempre queriendo atopar nellos un finxu musical tan cimeru... La pena ye que nun lu atopé, pero nel camín pañé otros dos o tres pa la llista de favoritos eternos. Gústenme muncho In The Wake of Poseidon y Islands porque los merqué daquella ensin nenguna referencia estilística y cuasi ensin saber qué yera esa banda. Munchos años depués prestáronmelos más modernos TrhaK y The ConstruKtion of Light, discos raros con influyencies inesperaes, como Tool o Nine Inch Nails, pero que guarden abondes ayalgues pa oreyes avezaes a lo inesperao. Vaya riestra de discos que tas enriestrando últimamente, Xandru, "Dark Side of the Moon", "In The Court...", "Sticky Fingers", "Vincebus Eruptum"... mete mieu.