Mike Bloomfield formóse como guitarrista de blues en Chicago, y en calidá de tal fixo carrera na banda de Paul Butterfield. Refugó ser parte estable de la banda de Bob Dylan, pero tocó con él nel lexendariu festival de Newport en 1965, co-protagonizando’l dramáticu divorciu de Dylan col mundu del folk. Tamién participara, unes selmanes enantes, na grabación de “Like A Rolling Stone”, onde coincidiera con Al Kooper. Según paez, Kooper, un xoven músicu d’estudiu, esperaba que-y dieren la oportunidá de ser el guitarrista que Dylan andaba buscando, pero darréu d’escuchar a Bloomfield aparcó la guitarra y retiróse a un requexu del estudiu de grabación. Foi pura casualidá que quedara llibre la plaza de teclista y que Kooper consiguiera pasar a la historia del rock pol so trabayu col muérganu Hammond nesa canción.Bloomfield y Kooper volvieron xuntase en 1968 pa grabar Super Session, un compendiu de blues-rock que quedó tarazáu pola dependencia de Bloomfield de la heroína y la so (lliteral) fuxida del estudiu. Kooper completó l’álbum sustituyendo a Bloomfield por Stephen Stills, recién salíu de la esperiencia de Buffalo Springfield y a piques d’embarcase nuna nueva aventura con David Crosby y Graham Nash.
Super Session nun ye un discu p’amantes de les canciones pegadices y/o de los efectos especiales en dos minutos y mediu. Ye un discu de rock con armadura de blues, onde cada parte (y cada instrumentu) desenvuelve una voz individual que s’acomuña con toles demás por pura necesidá metafísica. Les versiones de Curtis Mayfield, Bob Dylan y Donovan superen (siento dicilo) a los orixinales, y les composiciones de Kooper y Bloomfield nun queden atrás. Mención especial pal restu de los músicos: Barry Goldberg (pianu eléctricu), Harvey Brooks (baxu, firma tamién la última de les composiciones del discu) y Eddie Hoh (batería, brillante en tolos temes pero especialmente en “Season Of The Witch”).
2 comentarios:
Qué hai collaciu.
Grandísimu discu, grandísimos músicos, y qué gran versión del "Season of the wicht" de Donovan. Tengo la suerte del tener el vinilu compráu a preciu d'oro. Voi facete un apunte de Al Kooper respeutu a la grabación del "Like a rolling stone". El Highway 61 revisited tuvo dos productores: unu foi Tom Wilson (y si mal nun recuerdo productor de los tres anteriores discos de Dylan)y l'otru foi Bob Johnston. Tom Wilson llego a la casa de Dylan en Woodstock acompañáu d'un músicu mozu (20 añinos) nomáu Al Kooper qu'en teoría diba namás qu'a "mirar". El puestu de pianista yera de Frank Owens pero en la primera pieza que entamaron a grabar, que nun yera otra que "Like a rolling stone", a Dylan pareció-y que nun diba quedar mal un órganu. Depués de varies tomes quedáronse cola definitiva y toos quedaron ablucaos col trabayu d'esi rapaz que fora ellí pa mirar. Entamaba la lleenda d'un magníficu músicu y productor, amás de gran cazatalentos. Cuando se grabó esta pieza Tom Wilson abandonó la grabación (prestaríame saber por qué) y sustituyólo Bob Jonhston. Llueu ya sabemos tolo qué significó esi discu. ¿Y qué se podría dicir de Bloomfield y S. Stills? Buff, necesitaba 100 páxinas pa falar d'estos xenios.
Yá se t'echaba de menos, Melandru, dígotelo en serio. Tomo nota de los datos qu'apurres. Yo tengo noticia d'una historia llixeramente distinta, a saber: que Wilson prohibió esplícitamente a Kooper que tocara'l Hammond y que Kooper aprovechó una ausencia de Wilson pa desobedecelu y convencer a Dylan, que foi'l que decidió. En fin, qué sé yo. Y oi: eses 100 páxines que dices necesitar, escríbeles, ho. Yo déxote tol espaciu que precises, si lu quies.
Un abrazu.
Publicar un comentario