Jane’s Addiction tuvieron una trayectoria curtia pero fulminante, alpenes tres discos ente 1987 y 1990, el primeru d’ellos (dalgo bien inusual) en directu. Derrompieron un camín aspru que diba tener bien de siguidores nos años noventa, saltando del punk al metal y entemeciendo desenrollos instrumentales heriedes de Led Zeppelin y Black Sabbath con soluciones rítmiques de carís funk. Les etiquetes nun cuadraron mui bien a la de catalogar un repertoriu enllenu de sexu y violencia, riffs zeppelinianos (Dave Navarro ha contar ente los guitarristes más influyentes del momentu) y una voz, la de Perry Farrell, qu’ella sola podía valir como una banda de rock ensembre.Producíu por Dave Jerden, Nothing’s Shocking ye l’álbum onde se condensa tola agresividá suicida que los Jane’s Addiction marafundiaben nel escenariu. Un puñáu de temes onde’l serial killer Ted Bundy (“Ted, Just Admit It...”) convive con biografíes apócrifes de seres reciclaos de les cais de Los Angeles (“Jane Says”), incisiones aristofanesques (“Idiots Rule”) y retayos psicodélicos de llargu aliendu (“Summertime Rolls” y la imprescindible “Mountain Song”). Nos créitos apaecen collaboradores de luxu como Angelo Moore (Fishbone) y Flea (Red Hot Chili Peppers, banda onde diba militar Dave Navarro en diliéndose’l grupu).
2 comentarios:
Prefiero "Ritual de lo habitual" anque esti discu ta tamién mui bien. Por ciertu, la portada ye de Perry Farrell (el que ye artista ye artista). Nun taba facer un estudiu (si ye que nun ta ya fechu) de la rellación ente les bandes californianes de metá los 80 y años 90 coles bandes de Seattle. Camiento que la influencia foi mutua. ¿Qué tienen que ver bandes como Jane's Addiction, Rage Against the Machine, Korn, Faith no more, Bad Religion, etc., con bandes como Alice in Chains, Soundgarden, Pearl Jam, Nirvana, Mudhoney, Melvins, etc.? Hai un continente per medio, la mesma distancia que pueda haber d'equí a Rusia (nun me puse a medilo pero mas o menos)y, ensin embargu,anque les bandes nun "suenen na mesma onda", sí que se noten coses mui parecides. Por exemplu, ¿quién nun se creería que Stone Temple Pilots, de los que soi mas que "adictu", nun son de Seattle? Pues son de San Diego. Nun tengo mui estudiao la tradición musical de los grunges, pero toos sabemos de les influencies de les grandes superbandes ingleses de hard rock de los 60 y 70 y de les dos bandes mítiques pa ellos: Pixies y Sonic Youth. De les bandes californianes destaco esi toque "funk metal" que me parez nun tienen les de Seattle. Y digo yo ¿qué heredó esta xente de les bandes sicodéliques de la Costa Ueste de los 60? Por ciertu, el nome de Jane's Addiction ta puestu n'honor d'una collacia de Perry Farrell cola que compartía casa y otres sustancies adictives...
Hai relación, y muncha, anque seique l'elementu diferencial seya esi toque funk-metal. De mano, la escena: el circuitu pel qu'empezaron a tocar toes eses bandes ye básicamente'l mesmu, el qu'iguaron a finales de los 70 los grupos de hardcore con centru en California y tutelaos pol sellu SST (propiedá de Greg Ginn, de los Black Flag). En SST grabaron Sonic Youth (de Nueva York), Hüsker Dü (de Minneapolis), Meat Puppets (de Phoenix), etc. El circuitu underground taba bien establecíu pa cuando nació Sub Pop.
L'estudiu al que te refieres, o'l guañu pa facelo, ta nel llibru de Michael Azerrad, "Our Band Could Be Your Life (Scenes From The American Indie Undergorund 1981-1991)", Little, Brown & Co., NY, 2001. Ye una mina de datos y, cosa rara, ta mui bien escritu.
Publicar un comentario