
Tovía unes pallabres más sobre Bob Ezrin: ¿hasta qué puntu el so enclín hacia’l music-hall, el cabaret y la ópera de Mozart y de Wagner nun tien cambiao’l paisax del rock na década de 1970? Talentos compositivos aparte, lo cierto ye qu’a lo menos tres álbumes producíos por él (y otres tantes obres maestres, per otra parte) saluden al oyente con fanfarries mui asemeyaes: Berlin, de Lou Reed, The Wall, de Pink Floyd, y Billion Dollar Babies, d’Alice Cooper.
Billion Dollar Babies entama igual qu’un viaxe nel tren de la bruxa, si la bruxa se dignara recibir a los viaxeros: “Hello Hooray” da la bienvenida a un espectáculu onde’l suañu americanu devién pesadiella, un xuegu de travestismu y humor negru onde abonda la sátira política (“Elected”), el retratu xeneracional (“Generation Landslide”), la necrofilia (“I Love The Dead”) y la confesión en clave freak (“No More, Mr. Nice Guy”). Alice Cooper, nacíu Vincent Furnier, yera fíu d’un predicador y foi descubiertu y saludáu por Frank Zappa como la gran esperanza del rock. Ye difícil decidir cuál de los dos pas, el biolóxicu o l’intelectual, influyó más na obra de Cooper, pero por muncho que’l segundu-y apurriera’l sentíu de la ironía, el cinismu y la parodia, pamidea que foi’l predicador el que dexó una güelga más fonda: a fin de cuentes pocos llibros saben más d’asesinatos, violaciones y disfraces que la Biblia.
2 comentarios:
Yo voi dicite dalgo: la Biblia ye'l llibru porno por escelencia. Y Alice Cooper foi unu que nun taba nada contentu con tanta vida beata y tuvo que disfrazase pa pasar al llau del "malignu". Nótase bien qu'esti home tuvo a Zappa por padrín anque llueu garrara vuelu per otros cielos. Mezclar música con sexu y relixión nun yera nuevu (que-y lo entruguen a Juan Sebastian Bach) pero con él diba garrar otru puxu. Pa mi foi unu de los pioneros de lo que llamen "música satánica" y tamién, porque non, del movimientu góticu. Afiyáu: Marilyn Manson. El Billion dollar babies ye'l discu de la madurez, con músicos prósimos a les tendencies glam/acid rock: Steve Hunter, Dick Wagner...pero tamién había otros collaboradores que namás que'l diañu pue saber que facíen ellí: como ye'l casu de Donovan. Los grandes trabayos de A. Cooper llegaron cuando Boz Ezrin garró la producción (sí, el mesmu que fizo la de The Wall de los Pink Floyd). Seya como seya, unu de los meyores discos de los 70.
100 % d'alcuerdu
Publicar un comentario