domingo, 25 de enero de 2009

Tormenta cerebral

Esti post probablemente nun-y interese a naide. Nostante, como siempre m’aconseyaron llevar un diariu de les mios crisis y nunca nun fui quien a ello, pienso aprovechar l’espaciu d’esti blog como terapia.
Dende los ventiséis años vengo sufriendo una variedá de migraña conocida como “cefalea en recimos” o “cefalea de Horton”. Los ciclos duren ente tres selmanes y un mes, con ataques cada tres o cuatro díes d’una duración qu’oscila ente les dos y les doce hores. Una y bones acaba’l ciclu, nun tengo más ataques hasta que pasa aproximao añu y mediu.
L’últimu ciclu sufrílu n’abril de 2007. Esperaba pol siguiente episodiu n’ochobre de 2008, pero nun dio señales de vida. Pasó l’añu, entamó 2009, y yo yá contaba tar fuera de peligru. Error. Nin siquiera me llamó l’atención la hipomanía d’estes últimes selmanes.
Esta nueche tuvi’l primer ataque. Entamó a les dos y media de la mañana y llogré dormir por fin a una hora indeterminada, pero esconsoné tovía col llau izquierdu del crániu machacáu como si acabaren de prensámelu con mueles de molín. Pasélu a pelo, pero ye’l primeru del ciclu. Ello quier dicir que’l siguiente va ser más fuerte y por tanto toca dir al neurólogu y siguir un tratamientu nuevu y pémeque igual d’ineficaz que tolos anteriores. Nun funcionaron hasta agora nin l’almotriptán (almográn) nin el sumatriptán (novelián, imigrán, imigrán inyectable) nin la dihidroergotamina (hemicraneal, tonopán). L’osíxenu al 100 % tiénmelo aliviao en delles ocasiones, pero siempre me quedó la sospecha de si ye l’osíxenu o’l tiempu que paso na sala d’espera d’urxencies. La yerba nun te quita’l dolor, pero ayuda a distanciase d’él hasta ciertu puntu si l’ataque nun ye mui fuerte. (Almítense suxerencies.)
Asina qu’empieza la fiesta. Amigos y amigues, si esti mes pinta que toi difícil de localizar, yá sabéis qué ye lo que pasa: el castrón del hipotálamu, rancurosu él, que nun da tregua.
Nec spe nec metu.

[Pa llevantar l'ánimu, una de Wilco: Jeff Tweedy tamién ye migrañosu.]

11 comentarios:

Dígotelo yo dijo...

Pues nada fíu, a cuidase y que seya una hora piquiñina, como nos partos. A mio ma dáben-y migrañes tamién y sé lo que ye. Camiento que ye de les poques coses de la salú que meyoren cola edá, asina que per ehí tienes una rayadina d'esperanza.
Un abrazu,
La to estudiosa

Ismael Piñera Tarque dijo...

Vaya, jefe, este post interésanos a todos los que te conocemos y apreciamos, digo yo.

Eso sí, sugerencias ni una. De enfermedades imaginarias todavía, pero de estas de tan urgente hiperrealismo nada puedo decirte que no sea inútil tópico: paciencia, ánimo, etc. Dejémoslo en un abrazo.

Pablo Texón dijo...

Un abrezu, hermenu. Na salú y na enfermedá.

Traubert dijo...

Supongo que suxerir drogues de tou tipu y manera que calmen el dolor nun va ser una solución. Prefiero unime al abrazu xenéricu y, ya sabes, el vino ye salú -por si acasu-

Anónimo dijo...

Bones.
Yoga. Nun se si yá lo probares o daquién te lo encamentare. Dientro del yoga hai unos exercicios de control d'aliendu nomaos pranayama. Estos exercicios empobinen a meyorar la concentración y oxixenar el cerebru. Segun teo lleio amenorguen los eféutos de les migrañes.
Abultame meyor que les drogues, non?

Xandru Fernández dijo...

Gracies, nenos (y nena). De toes maneres, pienso siguir dando guerra, yá sabéis el dichu de Lisa Simpson (¿o yera de Nietzsche?): "lo que nun me mata, fáime más fuerte".
Abrazos.

Nodicho dijo...

Esto tampoco nun va servir pa aliviate nada, pero quería date les gracies por descubrime esta canción y esti discu de Wilco, porque cuantayá qu'intentaba meteme nesti grupu y nun yera pa con ello.
A ghost is born ta gustándome muncho, ye una especie de reconcilación. Lo dicho, gracies y que los ataques pasen pronto.

Xandru Fernández dijo...

Gracies. Y ten cuidao con Wilco, que crean adicción. Si'l Ghost ta prestándote, yá verás "Yankee Hotel Foxtrot".

Roberto Pato dijo...

tengo que date la razón colo de Wilco... en realidá lo que quería mandate yera un abrazu virtual que te ayude a espantar el dolor...

Anónimo dijo...

Xuliu César y Poe padecían migraña. Ah, y Harry Potter tamién. ¿La meyor droga? Lá música, siempre:
http://www.youtube.com/watch?v=8x6orjwYzxE

A cuidase, camarada.

Xandru Fernández dijo...

Gracies, Roberto, Melandru (los Amboy Dukes: ¿pa cuándo una reivindicación d'esa banda estraordinaria?).