martes, 20 de enero de 2009

Queen: "The Works" (1984)

1984 yera una cifra tremendamente simbólica: l’añu escoyíu por Orwell p’allugar la sociedá totalitaria del Gran Hermanu. La sombra d’Orwell llevaba tiempu proyectándose sobre la cultura popular, y el rock nun foi ayenu a la influyencia del mitu: yá David Bowie intentara diseñar un espectáculu basáu na novela, un proyectu fallíu del que quedaron namás restos nel so álbum Diamond Dogs (1974), y primero qu’él Hugh Hopper, autor d’un 1984 publicáu en 1973 (hai otros intentos, menos dignos musicalmente: lléase Anthony Phillips, o Rick Wakeman).
Cuando l’añu llegó, Orwell taba en toes partes, y un ciertu aire de velea entafarraba bien de producciones que, polo demás, teníen tanto que ver con Orwell como’l gobiernu d’Israel colos derechos humanos. La fiebre orwelliana tocó tamién de raspión a Queen, y concedió-yos una segunda mocedá nel universu pop. Inevitablemente, pertenezo a esa xeneración que conoció a Queen baxo la encarnación de The Works, el so álbum del añu Orwell, y tiendo a identificalos con esa megalómana mezclienda de heavy metal y electrónica que tardaría tovía años en frutiar (lléase Muse, por exemplu): por más que miro p’atrás y p’alantre na discografía d’esi grupu, y reconociendo incluso los munchos momentos de brillantez qu’hai nella (A Night At The Opera, fundamentalmente, y eso con munchos matices), la única conclusión a la que llego ye que nun tien muncho que ver conmigo.
Queen ye una de les bandes más kitsch de la historia del rock, si non la más. Si’l kitsch vien a ser la falsificación del efectu que produz la gran obra d’arte, lo kitsch siempres va tener dalgo de copia, de vulgarización d’un sistema estéticu pa consumu masivu, cola consecuencia non precisamente despreciable d’apurri-y al consumidor la ilusión de tar esperimentando una esperiencia estética xenuina, acordies coles maneres de l’alta cultura.
Con too y con eso, Queen nun son Poison. Son (foron) una banda competente, de músicos esperimentaos anque non demasiao brillantes, con un cantante, Freddie Mercury, superdotáu y con carisma. Lo que pudieron ser óise pente lo que verdaderamente foron, llamentablemente soterrao baxo la pulsión de paecese siempres a otros. Quiciás la obra menos kitsch de Queen ye precisamente la más kitsch, The Works, porque nella nun buscaben imitar a David Bowie o a Marc Bolan o a Mott The Hoople, sinón a los propios Queen. O quiciás ye namás que yo tenía catorce años en 1984 y tovía m’alcuerdo de cómo sonaben, daquella, temes como “Radio Ga Ga”, “I Want To Break Free” o “It’s A Hard Life”.

5 comentarios:

Anónimo dijo...

Vaya ho, nun pensaba que dibes censurame l'últimu mensaxe. Obnubilado me hayo. Parez mentira que seyas tan abiertu en temes musicales (dalgún día prestaríame compartir contigo y dalgún qu'otru llocu de la colina tola colección de xoyes qu'unu guarda como oro en pañu)y llueu te muevas en círculos tan cerraos (nun me lo tomes a mal, ye una observación de dalguien que conoz dalgo de mundu y nun soporta a los que van de sabios entendíos colos de casa)
Man on the prowl
You'd better watch out
I'm on the loose and I'm looking for trouble...

Xandru Fernández dijo...

Nun pierdas el bon gustu, Melandru. Alégrame tener la oportunidá d'esplicate por qué lo fici (ye'l problema de los anónimos: de saber quién yes --anque tengo una más que razonable sospecha--, yá teníes un corréu míu o una llamada por mor d'ello). Y nun creas que nun me costó. Costóme tovía más porque, si nun lo entendí mal, el tuyu yera un comentariu con bona intención, y agradezse no que val. Pero sí había, nin, una espresión que podía malinterpretase y facer que dalguién se sintiera mal. Y la verdá, nun me prestaría que naide entrara nesti blog y tuviera motivos pa sentise incómodu, seya'l que seya (bueno, seya'l que seya non: les comodidaes de xente como José María Aznar nun son de la mio incumbencia). Eso sí: a mi, que soi'l que lu firmo, puedes poneme a caldu tolo que quieras.
Sicasí, insisto en que s'agradez la intención.

Anónimo dijo...

Nun yera, collaciu, comentariu con mala intención pero unu propúsose pa esti añu salir dafechu de los círculos cerraos qu'históricamente nos afogaron. Fartucu toi de clanes y otres corporaciones. Nun creo que tol mundu pueda facer crítiques a los demás, anque seyan bones, pero bono, ye lo que hai. Nun te preocupare, préstame la lliteratura, claro, pero equí ye difícil nun nun echase a riir (por nun llorar)cuando unu intenta ser independiente (¿dignu?). Pero más me gusta la música y sicasí ye de lo que pienso falar nesti blog. Y agora toca esparder:

http://www.youtube.com/watch?v=oJgdNCYt_tA

Xandru Fernández dijo...

Melandru, o nun m'entiendes tu a mi, o nun t'entiendo yo a ti. En nengún momentu te quité de criticar nada, faltaba más. Agora, lo que nun me da pola gana ye que naide, ensin comelo nin bebelo, tenga que pasar un mal tragu por un comentariu ANÓNIMU nun blog. Y les mayúscules nun son accidentales. Tocante a lo de los círculos, y como creo que nun te refieres a los de la xeometría, diréte que me paez mui bien que faigas too eso que dices, pero nun te sigo colo demás: nun sé a quién te refieres col "nos" de "nos afogaron", y en cuanto a clanes, como nun formo parte de nengún, que yo sepa (ígual se m'escapa dalgún antepasáu escocés ente tantu xen ayerán), nun tengo muncho qu'opinar de los que sí lo faen. Vuelvo a recalcate que'l to comentariu primeru paecióme, eso sí, bienintencionáu, a lo menos hacia mi.
Un saludu.

Anónimo dijo...

Parez ser que nun nos entendemos nengunu de los dos, asina que pa evitar malentendíos vamos dexalu pa cuando tengamos la oportunidá d'echar un vasín per ehí. Sicasí lo que quería dicir reduzse a lo siguiente: l'asturianismu o'l nacionalismu cultural convirtióse (o foi siempre, qué sé yo) nun círculu viciosu qu'afuega, que "nos" afuega, tarde o tempranu, a toos. En nengún momentu taba falando de ti anque sí de too un movimientu con síntomes claros y históricos (la historia ta ehí pa sacar conclusiones) d'enfermedá dexenerativa. Y hai xente que s'empeña en dmostralo tolos díes. Tuve la suerte de vivir fora d'Asturies unos cuantos años pa dame cuenta de ciertes coses. Parezme que sí qu'hai círculos viciosos y como unu ta fartu d'ellos y quier vivir equí dignamente pémeque lo meyor ye ignoralos y garrar un avión de xemes en cuando. Y en bona compañía, claro. Un saludu, rapazón.