La curva del perru

Una y otra vez, vuelvo a Samuel Beckett. Con una periodicidá que nun ye llealtá nin muncho menos, que surde asina, por azar, pero por un azar predetermináu por un gustu qu’heredé de biblioteca ayena.
Digo que vuelvo a Samuel Beckett, cuando nel fondu ye sólo a una novela d’él a la que vuelvo: Molloy. ¿Por qué Molloy? Esta rellectura en concreto foi por culpa d’un comentariu míu a la novela de Xurde Fernández La espera. Calficaba yo esta novela de “beckettiana” y amigos tengo per ende que nun tuvieron d’alcuerdu, con razones de pesu abondo, lo que me llevó a entrugame qué entiendo yo por “beckettiano”.
Ello ye que volví a Molloy, y sigo atopando nes sos páxines esa especie d’actitú qu’atopé tamién en La espera, con toles diferencies que se quieran y qu’agora nun vienen al casu. L’actitú beckettiana ye la del vagamundu. Molloy y Moran son vagamundos, xente que se mueve con un rumbu que necesariamente ye circular (Molloy: “Y como había oído decir o más probablemente había leído en alguna parte, en el tiempo en que creía tener interés en instruirme, o en divertirme, o en embrutecerme, o en matar el tiempo, que cuando uno cree avanzar en línea recta en un bosque no hace en realidad más que describir círculos, ponía mi mejor voluntad en describir círculos, con la esperanza de avanzar así en línea recta”) na mesma midida en que dambos los dos son seres que busquen, que tienen un motivu (una finalidá: Molloy busca a la ma, Moran busca a Molloy). Molloy y Moran tienen una manera de buscar que se paez sospechosamente a un esperar: nengún d’ellos sigue la supuesta lóxica del qu’intenta llegar a dalguna parte, más bien actúen como si esperaren qu’ocurriera dalgo que, por una estraña causalidá, los conectara col oxetu de la so busca. Entiendo mui bien esa actitú.
En cinemática, conozse como “tractriz” o “curva del perru” a una curva de persecución que se define como la trayectoria d’un puntu arrastráu por otru que se desplaza en llinia recta. Funciona más o menos asina: si tu vas caminando per una cai en llinia recta y un perru cuerre pa contra ti, a la to busca, vas ver que’l perru en tou momentu se dirixe en llinia recta hacia la to posición; como tu yes un puntu en movimientu, tamién el perru acaba modificando’l sentíu del so desplazamientu, hasta que la so trayectoria se vuelve curvillinia. Una curva, ello ye, compuesta de cambios discretos d’orientación a partir d’una recta previa.
Tamién Molloy y Moran se mueven asina: los dos tienen un oxetu pa la so busca, pero al tratase d’una representación mental, y por tanto enxerta nuna cadena de pensamientos que siguen un rumbu discursivu propiu, el desplazamientu d’esa meta na serie de les pallabres modifica la trayectoria de los sos cuerpos, nuna perversión de los postulaos cartesianos que Beckett muestra tamién n’otres obres de so (Esperando a Godot, fundamentalmente). Asina les coses, el puntu omega de les sos trayectories respectives ta condenáu a ser diferíu indefinidamente, a nun ser qu’un axente esternu (un ayudante invisible y mudu) los ponga de nuevu nel senderu correctu (o más concretamente los tresllade a la llinia de meta).
Vuélvense asina, les suyes, trayectories errátiques, de vagamundu, onde’l movimientu devién diversión (otru ataque a la llinia de flotación cartesiana, esti dende l’artillería de Pascal) y onde les acciones, tamién, al vese desconectaes de la so finalidá, cain naquello que por abreviar (y por perplexidá) se llamó nel so tiempu “lo absurdo”.
Nun entiendo yo qu’heba nada necesariamente absurdo nes acciones de Molloy o de Moran, lo que nun hai nelles ye un sentíu que permita enxuiciales dende’l tableru de xuegu qu’ellos mesmos tracen como esplicitación de los principios (causales) de les sos carreres.

Otru día va haber que pensar si nun ye esta una situación análoga a la de nueso.