Tom Waits: "Swordfishtrombones" (1983)

Que Tom Waits cuente como ún de los creadores más llúcidos de la música contemporánea ye por acio de munchos factores combinaos: la voz, el talentu compositivu, l’agudeza poética y narrativa, pero too ello baxo’l control d’una capacidá única pa crear personaxes. Pamidea, esa capacidá nunca nun brilló tanto como en Swordfishtrombones, el primer álbum producíu pol propiu Waits, y el primeru tamién en que nun tuvo nengún prexuiciu a la d’echar mano de recursos espresivos de cualquier procedencia. Anque Kurt Weill y Captain Beefheart son, más qu’influyencies, modelos que Waits reconstrúi a lo llargo del álbum, nel fondu esti ye’l discu en que más acabáu resulta’l so propiu autorretratu al traviés de los rostros y les vides d’esos seres frayaos que pueblen tola so discografía. Un viaxe pel desastre qu’entama con esa especie de Internacional del inframundu que ye “Underground” y qu’inclúi estaciones de siniestra belleza como “Shore Leave”, “16 Shells From A Thirty-Ought-Six”, “Frank’s Wild Years” o “Gin Soaked Boy”.