Lo que’l 9 de marzu pudimos comprobar, por si nos quedara dalguna dulda, foi l’asombrosa derechización de la sociedá española. Una derechización disfrazada pola tamién inaparable tendencia al votu inducíu (tendencia impuesta polos medios de comunicación de mases, especialmente pola televisión, pero tamién pola rede). La izquierda real va siguir ausente del espaciu massmediáticu y eso ye dalgo que tien qu’asumir y combatir, pero principalmente asumir (y non tratar de suplir con campañes voluntarioses pero ineficaces, como se demostró). La derechización de la sociedá (podemos llamala d’otra manera si’l términu ofiende a les almes belles) va esixinos un esfuerciu suplementariu de propaganda que mal va poder llevase a efectu si gastamos les poques enerxíes que nos queden en xugar a ver quién tien la ideoloxía más grande.
Otra enseñanza del 9 de marzu ye que rompió’l virgayu que conectaba a la izquierda real con ella mesma al traviés de les xeneraciones. Hai miles de mozos y moces que nun comprenden nin el llinguax nin los símbolos d’esa izquierda, y que, en casu de necesidá, van canalizar les sos frustraciones per otros métodos que los políticos. El votante más nuevu yá nació depués que cayera la Muria de Berlín. Nun va ser fácil llegar a él con un vocabulariu y una intrahistoria que la xeneración más moza desconoz.
Finalmente, la izquierda real, con domiciliu social nun importa si en Girona o en Badajoz, tien que dexar de ver la pluralidá cultural y llingüística d’España como un problema. El votu de la disidencia sigue zapicando cola negación o la tibieza d’aquellos que, atrincheraos nun internacionalismu de boca p’afuera, cuenten tar viviendo nun planeta ensin diferencies, repitiendo consignes que yá nun signifiquen otro que la constatación d’una impotencia. Ye la fin d’un discursu y d’unos dogmes. Reconstruir yá nun pue siguir significando disfrazar.
[El videoclip, d'Offlaga Disco Pax: Robespierre. Atentos a la lletra.]
2 comentarios:
Diste nel clavu. Falta propaganda. Pero eso fai el problema entá más grande. Pa que la propaganda seya efectiva necesites medios y los qu'hai ya tan acutaos.Y ehí acabó la disidencia. El Che yá ye una marca tabacu.
Los referentes, los eslóganes, l'apueste buenista fagocitólos cuantayá esa otra ¿esquierda? qu'entra nel conceutu alternancia de gobiernu. L'exemplu italianu ye claro: nunca gobernará el partíu comunista anque ganara por munchu les eleiciones. El victimismu ye otru d'esos referentes que nos queda. La esquierda namás puede suañar con una capacidá d'influencia relativa, o con echase al monte (ver exemplu López Obrador). Ye'l tiempu de la domesticación.
D'alcuerdu, sí. Pero (anque nun seya'l mio estilu) piensa que yá pasemos per tiempos peores. Lo que nun pue ser ye que nos venza'l desánimu. Eso nunca.
Publicar un comentario