Ye estraño, en cierta midida, pero nun cuento qu’olvide la primer impresión que me dexó “Love To Love You (And Tonight Pigs Will Fly)”, la única canción d’esti In The Land Of Grey And Pink que foi compuesta pol guitarrista (y cantante) Pye Hastings. Aparentemente, un cantar naïf, a lo menos en comparanza col restu de les escursiones del álbum, especialmente cola suite “Nine Feet Underground”, compuesta pol teclista David Sinclair (les demás composiciones son obra del so primu, y baxista, y tamién cantante, Richard Sinclair).La impresión a la que me refería ye una especie de calma controlada, como si ún efectivamente formara parte d’una combinación de casualidaes sólo aparentes. Anque provienen del mesmu tueru, esa ye la diferencia ente Caravan y la so banda ximielga, The Soft Machine: lo que nesta ye improvisación ye naquella planificación y viceversa. Asina suena Caravan: como la banda sonora de la Tierra Media de J.R.R. Tolkien, sólo qu’un poco más porcaz. Les improvisaciones instrumentales son pautaes, como al caminar al aldu per una xeografía verde y nostante humanizada. El tonu ensembre ye’l d’una fiesta de prau psicodélica.
(Namás grabar esti discu, David Sinclair abandonó Caravan pa xunise a la nueva banda de Robert Wyatt, Matching Mole. Volvió a Caravan per temporaes, ensin dexar de trabayar n’otros proyectos como Hatfield And The North, Camel o The Polite Force.)
2 comentarios:
Grandísimu discu. "Golf girl" ye una de eses canciones que pondría siempre nuna llista de les meyores de la historia del rock, con esa voz tan elegante de Pye Hastings (¿por qué me recordará a la de Brian Ferry?),el mellotron alluninóxenu de David Sinclair y eses flautes fascinantes de Jimmy Hastings (por ciertu, hermanu de Pye). Conozo abondo bien Inglaterra, viví ellí casi un añu anque non na zona de Kent onde surdió'l soníu Canterbury. Pero sp qu'escucho a grupos como Caravan, Gong, Renaissance, Gilgamesh, Camel, etc., transpórtenme a esos llugares míticos, astraos de lleendes, de la campiña inglesa. Mas qu'a la Tierra Media de Tolkien, veo a esta xente mas averada a Chaucer y a la mitoloxía "campestre" de Robin Hood, que debió reencarnase nun tipu brillante nomaú Robert Wyatt.
Anque,too hai que dicilo, la sombra de King Crimson ye allargada...
http://calyx.club.fr/cantdisco/index.html
La tresfusión de sangre ente King Crimson y les bandes de Canterbury ye constante: Keith Tippet (teclista en discos de King Crimson como "In The Wake Of Poseidon" y "Lizards") reclutó pa la so propia banda a bien de músicos de The Soft Machine y Nucleus, ente ellos Elton Dean, por exemplu, pero tamién Mark Charig, otru monstruu...
Y casi pico, Melandru, pero'l que canta en "Golf Girl" ye Richard Sinclair... ;)
Publicar un comentario