De la triarquía británica del blues-rock (Clapton, Beck, Page: los tres procedentes de The Yardbirds), probablemente foi Jeff Beck el más innovador, el más perfeccionista, el menos apegáu a la tradición (Clapton) o a la emoción (Page). Piero Scaruffi tien escrito que foi Beck el qu’inventó la música rock con guitarra eléctrica, y nun ye nenguna esaxeración: cuasi toles técniques qu’él ensayó a mediaos de los años sesenta volviéronse d’usu corriente al final d’esa década.La banda que formó Jeff Beck n’abandonando The Yardbirds contaba con un tovía desconocíu Rod Stewart como voz solista, Ron Wood (que col pasu de los años entraría de guitarrista nos Rolling Stones precisamente por declinar Beck primero la ufierta) al baxu, Nicky Hopkins al pianu y Micky Waller na percusión. En Truth, el so primer álbum, collaboren tamién John Paul Jones, Jimmy Page y Keith Moon.
Truth ye’l bautizu del hard rock británicu, l’álbum que marca’l pasu del blues-rock a lo que darréu diba llamase heavy metal. Anticipóse namás qu’unos meses al primer álbum de Led Zeppelin, candidatu al mesmu puestu: en realidá, dambos discos representen la prollongación de lo que Beck y Page esperimentaren en The Yardbirds, la puesta a puntu d’un tipu de soníu que pol so enfotu na distorsión, nel usu de los pedales integraos na urdime de les composiciones, dexaba d’encaxar na categoría de blues mestizu que practicaben Clapton y compañía. Como si se tratara d’un pulsu, o d’una carrera pola definición canónica del nuevu estilu, nos dos álbumes hai una versión del mesmu tema de Willie Dixon, “You Shook Me”. Tamién apaez en Truth, abriendo’l discu, una versión de “Shapes Of Things”, que fuera un ésitu de The Yardbirds, más l’influyente “Beck’s Bolero”, coles sos guitarres ximielgues (Page y Beck) trenzando y destrenzando escales y el fuzzbox serrando una tanxencial referencia al boleru de Ravel.
Mención aparte merez Rod Stewart: “Shapes Of Things”, “Let Me Love You” y “Rock My Plimsoul” han contar ente les sos meyores interpretaciones y apunten yá les maneres del so trabayu posterior, tanto en solitariu como colos Faces.
7 comentarios:
Pa mí Jeff Beck, perdona que te diga, nunca llegó a los niveles de Clapton, Hendrix, Duanne Allman, o, mesmamente, del gran Frank Zappa, por munches innovaciones que ficiera o técniques qu'inventara. Cito a estos 4 pk son los primeros "galácticos" que me vinieron a la cabeza. Otra cosa foron discos como'l Wired o'l Blow by blow, nellos si que había un guitarrista maduru qu'aportaba coses distintes. Nunca me gustaron, ensin embargu, trabayos como esti Truth o'l Beck-Ola, ye como rock de segunda división. Estos discos tán pidiendo a voces a un cantante como Engelbert Humperdinck y non a Rod Stewart...
Home, Melandru, nun seyas tan cruel, ho. Lo d'Engelbert Humperdinck ye ensañamientu, collaciu...
De cualquiera de les maneres, creo qu'equí ye mui importante'l gustu personal. La primer llinia del to comentariu, por exemplu, si cambies a Beck por Clapton y a Clapton por Beck, podía firmala yo guapamente... Qué mal me cai Eric Clapton.
Home Xandru, una cosa ye'l gustu personal y otra distinta ye lo evidente. Podrá caete mal Clapton pero lo evidente ye que sinón ye'l meyor guitarrista de la historia del rock ta, seguru, ente los meyores. A la altura de Clapton sólo pongo a Hendrix. Y por encima de los dos (anque, curiosamente, seya la suma de los dos) ta'l que pa mi ye'l más completu técnica y espiritualmente: Stevie Ray Vaugham. Podría tar años falando de guitarristes pk unu siempre tuvo'l sueñu de ser una rock'n'roll star al mando d'una Fender Stratocaster. Pa mi los dioses sp foron esta xente hasta que descubrí el jazz y agora nun me decanto ente'l saxu de Coltrane o la trompeta de Fats Navarro o Clifford Brown. De toes formes, inda reconociendo que Jeff Beck ye un gran guitarrista, nunca lo tuve nel top ten de los "estratosféricos". Sabes con quién lo comparo muncho? Con otru que tamién quedó en promesa: Peter Frampton. Hai momentos de la carrera de Frampton, igual que na d'otros, que dices "joder, cómo toca esti gallu, esto ye insuperable", pero que llueu queden ehí, nun van a más. Jeff Beck tien momentos insuperables en Wired o Blow by blow y ehí se queden. Qué me dices sinón de Mick Taylor??
De Mick Taylor dígote que ta nel mio ranking, mui arriba, igual que Keith Richards, Jimmy Page... Tengo que confesar que nun me llama muncho l'atención el virtuosismu si nun ofrez dalgo más, y creo que Clapton, depués del fugaz proyectu de Blind Faith, ye impresionante como guitarrista pero ramplón como músicu, garrando esti términu na so acepción más amplia. A Jeff Beck pasó-y dalgo asemeyao en desfaciéndose'l grupu, y la so carrera de los setenta p'acá ye la d'un monstruu de la guitarra pero non la d'un creador que seduza colo que compón o lo que recrea.
¿Y aparte de los clásicos, Melandru? ¿Qué me dices de, por exemplu, Tom Morello?
Non, home, non, ¿cómo pues dicir que Clapton ye ramplón como músicu? Bluesbreakers, Cream, Blind Faith, Derek and The Dominos...y una de les carreres más dignes dp de casi 45 años nel tayu. Préstame tanto lo que fizo nos 70 como nos 60. Ye unu de los más grandes reintérpretes del blues pero non sólo del blues ¿Quién foi'l que popularizó a Bob Marley con aquella versión del I shot the sheriff nunu de los meyores discos de la década, el 461 ocean boulevard? ¿Quién fizo l'unplugged más famosu de tolos tiempos? ¿Sabes lo que dixo Duane Allman una nueche que lu vio tocar?: "Ye increible cómo toca esi putu dandi". Duane Allman, casi nada... Comparar a Tom Morello, a John Frusciante o Dave Navarro con esta xente ye complicao. Son dos époques diferentes, estilos diferentes, técniques y concepciones diferentes onde'l virtuosismu queda relegáu a un segundo planu, onde lo qu'importa ye la construcción de riffs y solos cortos y concisos. Inda asina tampoco tán a l'altura de Keith Richards o del grandísimu Steve Cropper...
Yá te lo pongo per delantre, con Clapton nun soi tolo oxetivu que quixera. Pero qué-y voi facer, con too y con ser un guitarrista escepcional, nun me diz muncho, sacante lo que fexo con Cream y Blind Faith, qu'ehí sólo faltaba pone-y taches. Del cover de Marley sólo te digo que prefiero l'orixinal, igual que de los que fexo de J.J. Cale. Y si sólo tuviera grabao'l 461 y el directu de "Just One Night"... pero pa caltener el nome que-y dio la época de Cream sigo pensando que lo que fexo nos 70 nun ta a l'altura. Como guitarrista nun te lu discuto, claro, pero tamién te digo: en "Just One Night" el que lleva les riendes ye Albert Lee.
Qué sé yo: al meyor ye que me cai mal y puntu. Asina que del "Unplugged" yá nun te digo nada...
Esti tipu d'alderiques guitarreros son tremendamente estimulantes, tol mundu tien lo so propia llista, asina que si de blues-rock se trata yo déxovos equí otru grande, clásicu onde los hubiere, Rory Gallaher. Pémeque yá salió n'anteriores ocasiones nesti blogue, pero siempre ye buen momentu pa reivindicalu y rendí-y pleitesía al maestru irlandés.
Publicar un comentario