Estraña banda con nome d’escritor. H. P. Lovecraft pertenez al arcu estilísticu y social de la psicodelia norteamericana, y comparte con Grateful Dead, Jefferson Airplane y Country Joe & The Fish el mesmu conceptu del soníu como territoriu onde non sólo’l constructor (el músicu) se fai responsable de trazar llendes y paisaxes, sinón tamién el viaxeru (l’oyente), davezu cola ayuda de sustancies psicotrópiques.Acordies con esa noción de la música como viaxe, H. P. Lovecraft recurre al folk, al pop, al music-hall, a les armoníes vocales, dexando pa prau otros desenrollos muncho triaos pela época como l’esperimentalismu sintácticu a lo Frank Zappa o’l ruidismu políticamente comprometíu a lo MC5. Nel so álbum de presentación, vagamente inspiráu poles obres del escritor de Providence, inclúinse versiones como “Let’s Get Together” (un clásicu de la época, escritu por Chet Powers y grabáu ente otros polos Youngbloods y Jefferson Airplane) y “I’ve Been Wrong Before” (orixinal de Randy Newman), al llau de composiciones propies como “The White Ship” o “That’s How Much I Love You, Baby (More Or Less)”, dignes de figurar en cualquier antoloxía del rock psicodélicu.
2 comentarios:
Collaciu:
¿faes tú los comentarios de los discos o cópiaslos de dalgún sitiu web? Son realmente bonos. Con H.P.Lovecraft toques una de les mies debilidaes musicales: la sicodelia de la Costa Ueste. Esti ye unu de los grandes discos d'esi movimientu únicu na hestoria de la música rock. Anque pa min la meyor pieza de H.P. Lovecraft ta nel so 2º discu: Spin spin spin, con esos coros tan hippies a lo Grace Slick y que llueu diben influir en grupos como It's a beatiful day, sobre too n'aquel grandiosu "White bird". Gran discu, amigu.
Modestamente, Melandru, los comentarios son míos, asina que gracies poles tos pallabres. Y tocante a "Spin, spin, spin", yo tamién pienso que ye una gran canción, igual que "It's About Time" y "Blue Jack Of Diamonds", xusto les tres primeres del segundu discu. Depués, pamidea, baxa un poco'l nivel, anque nun desmerez n'absoluto.
A Grace Slick habrá que dedica-y dalgo un día d'estos, igual qu'a Sandy Denny, que se fixeron los trenta años de la so muerte hai un par de selmanes. Mentanto, presta tenete perequí.
Publicar un comentario