De la carrera de Neil Young poco pue dicise que nun seya tópicu o mantra. De Rust Never Sleeps, el so álbum de 1979, tampoco nun ye fácil escribir ensin cayer na repetición de lo obvio. Una obra maestra. Y nun ye la única que ye dable atribui-y al so autor.Dividíu en dos partes, la primera de corte acústicu, ente’l folk y el country, la segunda eléctrica dafechu, ente’l punk y el roots-rock, el discu abre y pieslla col mesmu tema, con llixeres variaciones na lletra anque con dos sonoridaes totalmente diferentes: de “My My, Hey Hey (Out Of The Blue)” a “Hey Hey, My My (Into The Black)”, la secuencia ye un rosariu d’aforismos (“It’s better to burn out than to fade away”), arengues (“Rock and roll can never die”) y refranes (“There’s more to the picture than meets the eye”). Lacóniques sentencies frente a l’altura poética del siguiente tema na llista, “Thrasher”, onde s’añuden unos con otros dalgunos de los meyores versos enxamás escritos por Young, irónicu observador d’un yo comunitariu, a un tiempu’l d’una xeneración y el d’un oficiu. “Ride My Llama”, “Pocahontas” y “Sail Away” (impagable la voz de Nicolette Larson) son menos amargues que l’anterior, llíriques esploraciones de paisaxes abiertos, primes-hermanes d’otros álbumes de Young más pacíficos y tenres, como’l precedente Comes A Time (1978) o’l popular Harvest (1972).
La truena escomienza con “Powderfinger”, una narración de frontera, relatu en primer persona d’un sacrificiu al empar qu’autobiografía d’una víctima. “Look out, mama, there’s a white boat comin’ up the river”, empieza’l cantar, y efectivamente aproxímase un destín que se revela tan negru como la visión del protagonista darréu d’apuntar col rifle contra l’amenaza pa la que nun ta preparáu. Les testures metáliques condénsense detrás de la voz de Neil Young como nubes negres, y el turbón descarga del xeitu más ruidosu nos temes “Welfare Mothers” y “Sedan Delivery”, seique cínicos, seique frívolos, en tou casu tonantes como un exércitu armáu con decibelios.
Nun hai tregua en Rust Never Sleeps: últimu cumal d’una carrera enllena de creaciones piqueres, la so onda espansiva abarca una década entera, xusto’l tiempu que precisó Young pa volver a grabar un discu (Freedom, en 1989) que se paeciera siquiera a dalgún de los sos grandes momentos de los años setenta.
2 comentarios:
Poca xente sabe qu'esti discu ta grabáu en direutu (prácticamente nun se siente al públicu). Por eso suena tan contundente. Young utilizó dos bandes pa grabar (lo cual yera bien poco habitual). Pa la cara acústica Joe Osborne (baxu), Carl Himmell (batería) y N. Larson (voz). Pal llau xabaz, esa maquinaria ferruñosa llamada Crazy Horse. A partir d'esti discu acaba un ciclu y entama otru con una pregunta que seguru se fixeron los grandes monstruos de los 60: ¿qué vamos facer agora nos 80? Maxistral Neil Percival Kenneth Robert Ragland Young: Young, Neil Young-
Arrespiga cómo munchos d'esos monstruos, como tu los llames, pasaron los ochenta como si fuera una seca. El casu de Neil Young (que tien discos salvables nesa década, nostante, anque nun seyan comparables col restu de la so carrera) ye menos dramáticu porque llevantó cabeza nos años noventa, pero otros (toi pensando concretamente en David Bowie) nun fueron quien a ello. ¿La edá?
Publicar un comentario