Lisa Germano: "Geek The Girl" (1994)

Nun cuento qu’esista una visión femenina opuesta a la masculina, y les más de les veces dame que se remana una contraposición puramente ideolóxica y agresiva pa coles muyeres. Como muncho, toi dispuestu a reconocer qu’hai una serie de vivencies vedaes a los homes, igual qu’hai munches otres vedaes a les muyeres, y qu’ehí reside una diferencia que non por nun ser biolóxica ye menos importante. La singularidá d’eses vivencies percíbese na obra d’escritores como Alice Munro o Judy Budnitz, y tamién na d’escritores de canciones como Michelle Shocked o Lisa Germano.
Lisa Germano nun ye sólo la voz xuxuriante que-y fai coros a Iggy Pop o la violinista de John Mellencamp, ye tamién, y mui percima de cualquier otra cosa, una creadora de canciones mayúscules y una creación ella mesma, una y bones tien interiorizao y resuelto l’interrogante de cómo desenvolvese nel oficiu ensin dexar de ser muyer y rechazando, al mesmu tiempu, cualquier alusión bastarda y romántica a “lo femenino”. En Geek The Girl lo femenino ye la posibilidá de ser violada (“Cry Wolf”) o asaltada (“A Psycopath”), la tensión producida por una sexualidá asumida baxo presiones esternes (“Sexy Little Girl Princess”), tamién l’adoración pol imaxinariu de l’adolescencia (“Of Love And Colors”). Pieces firientes y crudes, al filu del sonambulismu, percorríes por un guiñu irónicu ensin cayer nunca na frivolidá, musicalmente más cerca del universu de Leonard Cohen, o del de Lou Reed, que del de munches de les sos presuntes compañeres de viaxe como Polly Jean Harvey o Tori Amos.

Queens Of The Stone Age: "Songs For The Deaf" (2002)

Queens Of The Stone Age (QOTSA) ye’l proyectu personal de Joshua Homme, guitarrista de los desapaecíos Kyuss y un músicu inquietu de talante obsesivu. La suya ye la órbita del desiertu, y, anque rechaza etiquetes como l’habitual “desert rock” pa definir la so música, cierto ye que pertenez a una escena desértica, concretamente la de Palm Desert, en California, onde Homme y compañía se formaron actuando en conciertos onde la electricidá la apurríen xeneradores y que yeren por eso llamaos “generator parties”. Si QOTSA foi la so nave nodriza dende’l principiu, hasta 2004 acompañólu’l baxista Nick Oliveri, tamién procedente de Kyuss. Los demás músicos van cambiando a lo llargo de los años, hasta’l puntu de que, en 2002, la formación de QOTSA incluyía a Dave Grohl (Foo Fighters) y a Mark Lanegan (Screaming Trees), collaboradores habituales de Homme. L’álbum que llanza a esta fugaz formación ye Songs For The Deaf, un rosariu de canciones ensariaes como nuna emisión radiofónica onde se resume l’abecedariu stoner: hard rock más psicodelia, lentitú y pesantez enantes que velocidá y brillantez, la herencia de Cream, Black Sabbath y Blue Cheer.

Muse: "Absolution" (2003)

Nuna escucha superficial, Muse podía pasar por una de les munches bandes surdíes al rau de Radiohead, si bien al escarbar un poco más lo que se descubre ye que los dos grupos remiten a un mesmu humus, y que si ye cierto que la sombra de Thom Yorke ye allargada, muncho más allargada ye la d’U2, que cai sobre ún tanto como sobre l’otru.
En ciertu sentíu, Muse puen pasar tamién pola continuación lóxica de la carrera de Radiohead depués de The Bends y enantes de mecer el rock melódicu y progresivu que yera la so marca de fábrica col so enclín cada vez mayor hacia la electrónica recreativa y el jazz de Charles Mingus. Pero si’l tema son les influyencies de Muse (anque’l tema nunca nun ye esi), tanto más evidente paez la de Queen, por exemplu, o la d’Ultravox, o la de Black Sabbath. Porque (tesis) Muse ye, nel fondu, un grupu de metal, y, como tolo que vien del metal, tiende fácil a l’almósfera glam, al barroquismu y a la coloratura. Cierto que Matthew Bellamy canta mui paecío a Thom Yorke, anque con una técnica más desarrollada y un talentu natural muncho mayor, pero tamién ye cierto que, con un atrezzo menos a lo Marc Almond, les sos maneres interpretatives nun diben desentonar muncho en, por exemplu, Van Halen.
Absolution foi un álbum (inxustamente) maltratáu pola crítica. Contién delles de les composiciones más pérites de Muse, como “Apocalypse Please”, “Time Is Running Out”, “Hysteria” o “Butterflies & Hurricanes”, amás d’oratorios paganos tan brillantes como “Blackout”, “Endlessly” o “Ruled By Secrecy”. Saturación de canales y virtuosismu vocal en toes y en caúna de les canciones. Y la posibilidá non mui remota de que la so trayectoria siga tovía una llinia ascendente.

Maratón Proust

- La otra vez tardé cinco años en lleer los siete volúmenes. Esti branu van dir toos darréu.
- Menos llobos, anda, menos llobos.

Alice Cooper: "Billion Dollar Babies" (1973)

Ye fácil meter a Alice Cooper nel mesmu sacu qu’a Lou Reed, David Bowie y Marc Bolan y llevantar asina la etiqueta del glam rock, como si les afinidaes superficiales fueren les que determinen la estructura de les creaciones artístiques. La realidá ye mui otra, y lo que nos muestra ye que, en quitando’l maquillax y la sombra de güeyos, los reis del glam pertenecíen a universos bien estremaos. Asina, l’aproximación de Lou Reed a los zapatos de plataforma duró xusto lo qu’influyeron nél los productores de Transformer (David Bowie) y Berlin (Bob Ezrin), y el propiu Bowie foi capaz de desfacese de sigo mesmu hasta cayer reinventáu en brazos de Brian Eno y, a lo menos dende 1980, desendolcar una carrera tendente a la mediocridá. Pel so llau, Alice Cooper devieno iconu del heavy metal, lo que refuerza la hipótesis de que’l nucleu del glam rock yera sólo una fase nel desenrollu del metal, como yá sabíemos gracies a Kiss (tamién producíos por Ezrin) y Mötley Crüe.
Tovía unes pallabres más sobre Bob Ezrin: ¿hasta qué puntu el so enclín hacia’l music-hall, el cabaret y la ópera de Mozart y de Wagner nun tien cambiao’l paisax del rock na década de 1970? Talentos compositivos aparte, lo cierto ye qu’a lo menos tres álbumes producíos por él (y otres tantes obres maestres, per otra parte) saluden al oyente con fanfarries mui asemeyaes: Berlin, de Lou Reed, The Wall, de Pink Floyd, y Billion Dollar Babies, d’Alice Cooper.
Billion Dollar Babies entama igual qu’un viaxe nel tren de la bruxa, si la bruxa se dignara recibir a los viaxeros: “Hello Hooray” da la bienvenida a un espectáculu onde’l suañu americanu devién pesadiella, un xuegu de travestismu y humor negru onde abonda la sátira política (“Elected”), el retratu xeneracional (“Generation Landslide”), la necrofilia (“I Love The Dead”) y la confesión en clave freak (“No More, Mr. Nice Guy”). Alice Cooper, nacíu Vincent Furnier, yera fíu d’un predicador y foi descubiertu y saludáu por Frank Zappa como la gran esperanza del rock. Ye difícil decidir cuál de los dos pas, el biolóxicu o l’intelectual, influyó más na obra de Cooper, pero por muncho que’l segundu-y apurriera’l sentíu de la ironía, el cinismu y la parodia, pamidea que foi’l predicador el que dexó una güelga más fonda: a fin de cuentes pocos llibros saben más d’asesinatos, violaciones y disfraces que la Biblia.

El regresu de Sylar

Ayeri la TPA emitió l’últimu episodiu de la segunda temporada de Héroes, y contra lo que munchos bilordiaben nun foi precisamente una decepción (anque sí ye cierto que se nota, nel ritmu de los últimos capítulos, la presión de la fuelga de los guionistes de Hollywood). El final ye muncho más amargu y abiertu que’l de la primer entrega, acordies col rumbu que va tomando la serie y que me lleva otra vuelta a una idea fixa que yá comenté equí, creo. La pulsión, detectada en bona parte de la narrativa norteamericana más nueva (seya en formatu llibrescu, seya en formatu audiovisual), de remover l’imaxinariu del comic de superhéroes en clave d’axuste de cuentes xeneracional, y que d’un xeitu canónicu se muestra nel cuentu de Jonathan Lethem “Super Goat Man”, atraviesa Héroes de parte a parte: equí los superhéroes son los fíos d’una xeneración que quixo cambiar el mundu utilizando técniques bioxenétiques, y los fíos son al empar protagonistes y víctimes non tanto de virus y mutaciones cuanto d’una filosofía milenarista que conocemos a la perfección. Sí, ye’l mesmu enfoque del Hulk d’Ang Lee, sólo qu’a la lluz indirecta d’esa xoya de la narrativa contemporánea que ye Watchmen, d’Alan Moore.

Un llibru con alma

Ún yá ta retiráu (eso sí, sólo provisionalmente) del mundu de la crítica, y ye por eso qu’últimamente namás me da por “recomendar”, con tolo qu’eso pueda valir, poco o muncho, dalgún llibru que me tocara l’alma, y acasu tamién poner a caldu a dalgún otru que me tocara les pelotes. Que los hai, d’estos últimos, pero nun ye’l casu. Lo que tengo nes manes (aforremos chistes malos, por favor) ye’l poemariu de Pablo Texón La culpa y la lluz, del que yá se tienen dicho pallabres mui esactes y arrimaes a lo pulío de los sos versos. Yo apurro equí namás la versión directa d’esos merecíos eloxos, la que diz que m’emocionó en xunto la voz de Pablo nestos poemes, maduros y cenciellos, rotundos y doliosos. Poemes como “Kamchatka o Brasil”, “Arte y ensayu”, “Sub Londres”, o’l poema ensin títulu qu’abre’l llibru, declaración de principios, o más bien de finales. Encantáu los firmaba, francamente.

The Clash: "London Calling" (1979)

London Calling o la Biblia. De cómo’l punk algamó la mayoría d’edá. O de cómo The Clash reconstruyeron el llinguax del rock dende los cimientos. “The ice age is coming / The sun's zooming in”: asina anunciaba Joe Strummer l’apocalipsis, como un muecín a la oriella del Támesis. El Támesis, o’l Mississippi del gospel punk. “London calling to the zombies of death / Quit holding out and draw another breath”. Joe Strummer, o cómo cuspir les canciones envede cantales. A les puertes de la fin del mundu, hai tiempu pal ska (“Wrong’em Boyo”), pal reggae (“Revolution Rock”), pal rock’n’roll (“Brand New Cadillac”). Paul Simonon estrizando un baxu Fender contra les tables del escenariu, añédes-y a la foto unes lletres en rosa y verde y el resultáu ye una cubierta qu’asonsaña la del primer álbum d’Elvis Presley, apertura y pieslle. La muerte o la gloria. La mocedá ye un conceptu baleru. “You don’t owe nothing, so boy, get running / It’s the best years of your life they want to steal”. Un mitu: Montgomery Clift (“The Right Profile”). Tenemos tolos cupones de descuentu y yá probemos tolos sabores posibles de toles marques esistentes. Mick Jones, de los London SS a Big Audio Dynamite: constancia y coherencia. Brixton rastafari. ¿Quién son esos cuatro xinetes? “They were given the grapes that go ripe in the sun / That loosen the screws at the back of the tongue / But they told no one where they had begun”. Un mitu: Robert Johnson (“Train In Vain”). La guerra civil española, o’l gran ensayu de la revolución. London Calling ye política, naturalmente. Si una escopeta pue meter ruíu, ¿por qué nun va disparar una guitarra? London Calling, o’l doble álbum favoritu de Federico García Lorca. Impugnación de los Sex Pistols: sí había futuru, y yera esto... London Calling ye’l guión de la novela que siempres quixi escribir. Tamién yo vivía xunto a un ríu. Sattamassaganna.

Television: "Marquee Moon" (1977)

Tom Verlaine ye una figura clave pa entender la escena punk neoyorquina, tan imprescindible como Patti Smith o John Cale (o Brian Eno, padrín in pectore de tola cla). Verlaine formó Television xunto a Richard Lloyd, Billy Ficca y Richard Hell, que nun tardó n’abandonalu pa xunise a los Heartbreakers de Johnny Thunders (Fred Smith, ex-baxista de Blondie, foi’l so sustitutu). Nun ye nenguna esaxeración afirmar que, fueren los que fueren los demás músicos, y mesmo ensin ellos, Television furrulaba sólo con Verlaine y Lloyd, dos guitarristes interdependientes, compenetraos hasta los matices más sutiles. El so primer y maxistral álbum, Marquee Moon, abre con “See No Evil”, una pieza que bien pudiera inaugurar l’inesistente xéneru del rock’n’roll de cámara, con una sección rítmica tan discreta como una alfombra persa y un entrelliz de guitarres qu’amenaza con espurrise ad infinitum. “Venus”, quiciabes la canción más contundente de Verlaine dende’l puntu de vista lliterariu, remembra la so amistá con Hell a la lluz oblicua de los sos inspiradores, Paul Verlaine y Arthur Rimbaud. “Marquee Moon” y “Torn Curtain” son otres dos pieces antolóxiques, sesiones cuasimente de paisaxismu sonoru, críptiques y delicaes, culminación d’un estilu que nun tuvo alpenes continuadores (los Felt de Lawrence Hayward son cuasi una escepción).

Jane's Addiction: "Nothing's Shocking" (1988)

Jane’s Addiction tuvieron una trayectoria curtia pero fulminante, alpenes tres discos ente 1987 y 1990, el primeru d’ellos (dalgo bien inusual) en directu. Derrompieron un camín aspru que diba tener bien de siguidores nos años noventa, saltando del punk al metal y entemeciendo desenrollos instrumentales heriedes de Led Zeppelin y Black Sabbath con soluciones rítmiques de carís funk. Les etiquetes nun cuadraron mui bien a la de catalogar un repertoriu enllenu de sexu y violencia, riffs zeppelinianos (Dave Navarro ha contar ente los guitarristes más influyentes del momentu) y una voz, la de Perry Farrell, qu’ella sola podía valir como una banda de rock ensembre.

Producíu por Dave Jerden, Nothing’s Shocking ye l’álbum onde se condensa tola agresividá suicida que los Jane’s Addiction marafundiaben nel escenariu. Un puñáu de temes onde’l serial killer Ted Bundy (“Ted, Just Admit It...”) convive con biografíes apócrifes de seres reciclaos de les cais de Los Angeles (“Jane Says”), incisiones aristofanesques (“Idiots Rule”) y retayos psicodélicos de llargu aliendu (“Summertime Rolls” y la imprescindible “Mountain Song”). Nos créitos apaecen collaboradores de luxu como Angelo Moore (Fishbone) y Flea (Red Hot Chili Peppers, banda onde diba militar Dave Navarro en diliéndose’l grupu).

Nel reinu del segurata

Lisboa, 12 de xunetu de 2008, 21 hores. Falten unos cuarenta minutos pa qu’entame’l conciertu de Neil Young, y Silvia y yo yá tamos na filera d’alantre, apoyaos na valla metálica que llenda’l fosu, de palique con un incomprensible ciudadanu británicu con camiseta de los Pixies, la so muncho más accesible (llingüísticamente falando, a lo menos pa Silvia) compañera, y un rapaz de Vigo que busca quien lu volver sanu y salvu a la so tierra. Al otru llau de la valla ta’l reinu del segurata. Un reinu fascinante. La nueche del xueves, mientres actuaben Rage Against The Machine, diome tiempu a catalogalos afechisco, a los segurates. El xefe, un mazu de ximnasiu con gafes negres, calvu y con perilla a lo James Hetfield, muévese d’un estremu a otru del fosu con sorrisa de preocupación y mirada de ferre. Depués hai un mozu negru y escultural, firme como un Beefeater, y otru blancu y un poco fondón que descansa’l so pesu cuando na pierna izquierda cuando na derecha. L’ambiente ye güei más relaxáu que’l xueves, seique un vieyu hippie nun supón una amenaza tan clara como los RATM, asina que los segurates, y Hetfield el primeru, tómenlo con calma. Toos menos ún. Un mórsidu barrigudu y coles oreyes de picu, que de contino llevanta una mano p’avisar a cualquiera del públicu que nun faga esto o aquello y a cada poco fai-y un xestu a Hetfield pa que controle daqué cosa (a lo que Hetfield contesta con un biecu de resignación y un evidente pensamientu: “qué coño quier agora esti pelmazu”). El mórsidu ye d’esos que te busquen la mirada esperando que-y la aguantes pa preguntate qué mires. Tien ganes de griesca. A les cuatro o cinco llamaes d’atención, Hetfield sustitúilu.
El vienres recibiéremos un mensax de Pablo y una llamada de Naciu y enteráremosnos de lo que fixeren PP y PSOE col estatutu y concretamente cola llingua asturiana. Depués d’unes cuantes hores xurando n’arameo, ensin saber mui bien por qué, yá que yera bien previsible, velequí que me dan unes ganes tremendes de buscar al mórsidu en cuestión y dici-y cuatro coses. Dici-y, por exemplu, “mira lo que fixeron los tos amigos col mio idioma”, o “xente como tu ye la que decide’l futuru de la mio llingua”, o simplemente (pa qué da-y esplicaciones que nun diba comprender) “y tu qué coño mires”. Equí, nesti fosu, ye Hetfield el que manda, pero n’Asturies, nel reinu del segurata, son los mórsidos los que lleven la batuta.
[Del conciertu de Neil Young sobren pallabres. Quitando que nun fixo más qu’un bis, una versión cuasi punki de “A Day In The Life”, de The Beatles, nun hai tacha que pone-y. Una primer parte eléctrica y cañera, abriendo con “Love And Only Love” y siguiendo con “Powderfinger”, “Cortez The Killer” y “Rockin’ In The Free World”, ente otres; una segunda parte de corte más acústicu y country, con “The Needle And The Damage Done”, “Heart Of Gold”, “Old Man”...; y un broche de distorsión con dos temes espurríos hasta que los instrumentos dixeron basta: “Words” y “No Hidden Path”.]

[[La semeya, de xadoc_dna.]]

De vuelta

De vuelta na tabierna, depués d'unes curties vacaciones en Lisboa. Tal paez que nun fueren tan curties, cuando-yos dio tiempu al PSOE y al PP pa demostrar una vegada más que nun tienen el menor sentíu de la responsabilidá. Como si necesitáremos más demostraciones. Mañana, si los güesos nun se m'esmigayaron dafechu, dedicámos-yos unes llinies. O non.
Lisboa, 12 de xunetu de 2008. Asina empezaba.

Cuando los rabinos conquistaron Alaska

En El hombre en el castillo, Philip K. Dick imaxinó un mundu alternativu onde Xapón y Alemania ganaren la Segunda Guerra Mundial y repartieren los Estaos Xuníos. En La conjura contra América, Philip Roth dibuxó un universu paralelu onde Charles Lindbergh llegara en 1940 a la presidencia de los Estaos Xuníos y firmara un pautu con Hitler. El sindicato de policía yiddish, de Michael Chabon, respuende a les convenciones d’esti tipu de noveles qu’alcuando llamamos ucroníes a falta de nome meyor. Nesti casu, tamién ye’l sieglu XX el que siguió un cursu distintu al que nós-y conocimos: l’intentu de crear l’Estáu d’Israel fracasó y los xudíos afinquen n’Alaska.
¿Por qué Alaska? A saber. Pero cuido que tien que ver col poder que pa Chabon tien la imaxe del individuu (o’l pueblu) aislláu nun mundu de fríu y xelu, como yá dexara claro en Las asombrosas aventuras de Kavalier y Clay, cuando un de los protagonistes, precisamente Kavalier, acaba esiliáu na Antártida. Una imaxe seique non sólo poderosa no personal sinon igual d’arquetípica: tamién Superman, un héroe de comic (Kavalier ye dibuxante de comics) creáu por dos xudíos (Shuster y Siegel), tenía nel xelu polar el so llugar de retiru, la Fortaleza de Soledá.
El sindicato de policía yiddish ye, polo demás, pura novela negra na tradición reciente del thriller políticu, col so detective perdedor y el so ayudante pintorescu, la so mafia verbover y un bon puñáu de personaxes estraíos del imaxinariu lliterariu xudeoamericanu. Xeométrica y kafkiana, la novela déxase tastiar como'l formidable artefactu llingüísticu que ye. Agradezse, depués de les últimes decepciones, atopar otra vuelta un llibru ambiciosu y seductor.

Diez años y cinco discos

Los que cumple Toli Morilla apostando polo difícil. Pa cellebralo, él mesmu pon tola so discografía a disposición del respetable en formatu mp3. Gracies, grande.

Caravan: "In The Land Of Grey And Pink" (1971)

Ye estraño, en cierta midida, pero nun cuento qu’olvide la primer impresión que me dexó “Love To Love You (And Tonight Pigs Will Fly)”, la única canción d’esti In The Land Of Grey And Pink que foi compuesta pol guitarrista (y cantante) Pye Hastings. Aparentemente, un cantar naïf, a lo menos en comparanza col restu de les escursiones del álbum, especialmente cola suite “Nine Feet Underground”, compuesta pol teclista David Sinclair (les demás composiciones son obra del so primu, y baxista, y tamién cantante, Richard Sinclair).
La impresión a la que me refería ye una especie de calma controlada, como si ún efectivamente formara parte d’una combinación de casualidaes sólo aparentes. Anque provienen del mesmu tueru, esa ye la diferencia ente Caravan y la so banda ximielga, The Soft Machine: lo que nesta ye improvisación ye naquella planificación y viceversa. Asina suena Caravan: como la banda sonora de la Tierra Media de J.R.R. Tolkien, sólo qu’un poco más porcaz. Les improvisaciones instrumentales son pautaes, como al caminar al aldu per una xeografía verde y nostante humanizada. El tonu ensembre ye’l d’una fiesta de prau psicodélica.
(Namás grabar esti discu, David Sinclair abandonó Caravan pa xunise a la nueva banda de Robert Wyatt, Matching Mole. Volvió a Caravan per temporaes, ensin dexar de trabayar n’otros proyectos como Hatfield And The North, Camel o The Polite Force.)

AC/DC: "High Voltage" (1976)

Nos años ochenta, y especialmente ente 1982 y 1985, cuando nós yéremos poco más qu’adolescentes ensin nada que facer (o poco menos), la música tenía un tresfondu gregariu, de patiu d’escuela, de guerres de bandes y conflictos pueriles por cuasi too. Si te gustaba’l heavy metal (si yeres un jevi, escrito asina, que ye como más se traduz el xeitu de pronuncialo abasando la e), entós teníes qu’odiar cualquier tipu de música onde nun hubiera guitarres con modales de serruchu nin cantantes vocinglando como si-yos tuvieren pillao una mano con una puerta. Y si nun yeres jevi, entós nun podía gustate nengún grupu de heavy metal, nin siquiera ciertos grupos que nun yeren tal pero que los jevis reivindicaben como si fueren d’ellos (y nun-yos faltaba razón, porque a pocos más qu’a ellos-yos gustaben realmente). Un d’esos grupos heavies d’adopción foi AC/DC. Nada que ver cola escudería que marcaba tendencia daquella, colos pesos pesaos de la NWOBHM (New Wave Of British Heavy Metal, lléase Iron Maiden, Motörhead, Saxon, etc.) o colos llonxanos abanderaos del speed y del thrash (Slayer, Metallica, Megadeth, etc.). AC/DC practicaben un rock clásicu, rollingstonianu, d’aires de blues y de boogie, acanalláu y sórdidu y más cerca de Humble Pie que de Metallica ensin dulda nenguna. El guitarrista Angus Young y el cantante Bon Scott alzaben una muria d’estrueldu y adrenalina que nun necesitaba evocaciones satániques (anque tamién les tuvieron) nin escenografía vikinga (esto sí que non, que yo sepa) pa tresmitir ferocidá y testosterona de suburbiu a chorru. El primer álbum suyu que rodó fuera d’Australia, High Voltage, ye una criatura frankensteiniana, fecha con canciones de los sos dos primeros discos australianos, onde s’afayen himnos como “It’s A Long Way To The Top” (con gaita incluyida), “Rock’n’Roll Singer”, “T.N.T.” o “She’s Got Balls”. Seique nun ye l’álbum más popular d’AC/DC, pero nél ta la matriz de tola so trayectoria.

Van por llibre

Si ye como diz la prensa, esos tres van por llibre. Nun representen a naide. Nun condicionen nada. Tampoco nun ayuden nada. Toa esta situación, qu’ensin duldes tien responsables (nun cayó del cielu), ta volviéndose un enguedeyu con una víctima clara: la llingua asturiana. Hailos que se ven cómodos col apartheid llingüísticu y nun ye d’estrañar qu’esos mesmos se comporten como caníbales intelectuales. Los demás, por suerte o por desgracia, somos los que tenemos que midir cada pasu y tar al altor de les circunstancies. Eso nun significa necesariamente combayar colos que nos sieguen la herba embaxo los pies, pero tampoco poné-yoslo en bandexa con actitúes mafioses. Hai una campaña qu’estos díes lleva alantre’l CAO baxo’l lema DOI LA CARA POLA OFICIALIDÁ. Eso ye lo que toca, dar la cara, non escondela detrás d’un trapu.

¿Será broma?

Paez una broma. De mal gustu, eso sí. Pero entiendo que nun pue haber perspectives de seriedá cola que ta cayendo. D’a diariu, equí tou bichu viviente con un amigu periodista pue echar la llingua a pacer, insultar a los falantes d’asturianu y nega-yos un derechu que tolos falantes de toles llingües peninsulares han ver reconocíu por imperativu constitucional. Un día ye la señora Rosa Díez, que como nun pue colos falantes del euskera (digo yo que será por eso), truñe contra nós ensin que-y vaiga nin-y venga l’asuntu. Otru día ye l’especialista en El Jarama el que se siente con autoridá moral p’anteponer los sos prexuicios a les sos obligaciones como profesor y como científicu (presuntu). Un decanu, que nun movió un deu cuando en plena campaña electoral apaecieron cartelos pela so facultá ridiculizando a los candidatos favorables a la normalización del nuesu idioma, salta agora indignáu porque apaecieron pintaes contra un profesor contrariu a la mesma. El rector ve que ta moyao pero piensa que regaron y sal ensin paragües. El mesmu gobiernu qu’aplaude una reforma estatutaria discriminatoria declina intervenir nel conflictu de la facultá de filoloxía porque diba ser inxerencia. Un grupu de profesores, ente los que se cuenten dalgunos bonos amigos míos, roblen un manifiestu del que nun se pue sacar nenguna conclusión en llimpio sacante que ye inoportunu. El rector busca desesperáu un soportal onde atechase. Y nos suburbios de la galaxa, encontáu por un garrapiellu d’asturianistes “lliberales”, el PP asturianu robla’l manifiestu en defensa del castellanu pa garantizar la enseñanza d’esta llingua. ¿Qué ye, si nun ye una broma?

[El videoclip, de Faith No More: "I Started A Joke". Y sí, l'orixinal yera de los Bee Gees.]

Screaming Trees: "Sweet Oblivion" (1992)

Con un soníu mui cercanu al hard rock de los setenta, efectos psicodélicos y gustu polos crescendos y los finales pantagruélicos, Screaming Trees brotaron del mesmu humus que Pearl Jam, Alice In Chains y Soundgarden. Nun algamaron el mesmu ésitu masivu qu’estos grupos pero sí un prestixu sólidu y mesmo acrecíu a partir de la desapaición de la banda y l’esporpolle de la carrera solista del so cantante Mark Lanegan. Una voz, la de Lanegan, que, anque nos sos álbumes en solitariu dexa ver la clara influyencia de Johnny Cash y Leonard Cohen, recordaba muncho, nos sos años al frente de Screaming Trees, al timbre cascáu y fondu del cantante de Jethro Tull, Ian Anderson. Seique Jethro Tull figura ente los modelos de la banda, igual que Led Zeppelin o The Doors, pero a partir d’esi modelax apruz un mundu propiu, irónicu, de guitarres llíquides y ecos de soul y garage. Sweet Oblivion foi l’álbum qu’había disparalos a la fama y nun lo llogró, magar de temes tan pulcros como “Shadow Of The Season”, “Nearly Lost You”, “Dollar Bill” o “Winter Song”.